Երևանի բիլիարդանոցներից մեկում պատանդ պահվող քաղաքացուն ազատեցին դիպուկահարի միջոցով

6

shamshyan.com-ը գրում է

Արդեն 1 ժամից ավելի է, լարված ու պայթյունավտանգ իրավիճակ է ստեղծվել Երևանում։ Ինչպես դեպքի վայրից հայտնում է ֆոտոլրագրող Գագիկ Շամշյանը, Էրեբունի վարչական շրջանում գտնվող բիլիարդանոցներից մեկում մի տղամարդ մի աղջկա է պատանդ պահել և սպառնում է, որ կսպանի նրան։ Այս պահին դեպքի վայր են ժամանել մեծ թվով իրավապահներ՝ Ոստիկանության Երևան քաղաքի վարչութան պետ Սարգիս Մարտիրոսյանի, քրեական հետախուզության բաժնի պետ Գարիկ Ղուկասյանի գլխավորությամբ։ Նշված շինության ապակիներն ամբողջովին փշրված են, գույքը՝ ջարդված։ Տեղում են նաև Երևանի 1-03 շտապօգնության ծառաղողները, ինչպես նաև Հայաստանի քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչներ և ճանապարհային ոստիկաններ։

*** 16:40

Քիչ առաջ ոստիկանները պրոֆեսիոնալ ձևով կարողացան դիպուկահարի միջոցով վիրավորել աղջկան պատանդ պահող ճիվաղին, ով տեղափոխվեց հիվանդանոց; Դեպքի վայր են ժամանել ՀՀ ոստիկանապետի առաջին տեղակալ, Ոստիկանության գեներալ-լեյտենանտ Հունան Պողոսյանը, ՀՀ ոստիկանապետի տեղակալ, Ոստիկանության գեներալ-մայոր Սամվել Հովհաննիսյանը, կազմակեպված հանցավորության դեմ պայքարի (6-րդ) գլխավոր վարչության պետի առաջին տեղակալ, Ոստիկանության գնդապետ Ալիկ Մարգարյանը, ովքեր Երևանի ոստիկանապետ, Ոստիկանության գնդապետ Ս. Մարտիրոսյանի հետ համատեղ իրականացրեցին ճիվաղին վնասազերծելու օպերացիան։ Այս պահին արդեն դեպքի վայր են ժամանել քննիչներ։ Հաշվի առնելով հանցագործության վտանգավորության աստիճանը՝ առաջին իսկ պահից դեպքի վայրում էր նաև Էրեբունի և Նուբարաշեն վարչական շրջանների դատախազ Արմեն Չիչոյանը։

***

Ֆոտոլրագրողի տեղեկություններով՝ վնասազերծվածը քիչ առաջ «Էրեբունի» բժշկական կենտրոնում մահացավ։ Այս պահին էլ Հայաստանի քննչական կոմիտեի Երևան քաղաքի քննչական վարչության էրեբունի և Նուբարաշեն վարչական շրջանների քննչական բաժնի մեծ թվով քննիչներ՝ քննչական բաժնի պետ Արթուր Գոյունյանի գլխավորությամբ կատարում են դեպքի վայրի զննություն։