Հայտնի օլիգարխների վճարած հարկերը նվազել են. ու՞մ հաշվին է լցվում պետբյուջեն

Պետական եկամուտների կոմիտեի կայքում հրապարակվել է 2021թ. երկրորդ եռամսյակի 1000 խոշոր հարկ վճարողների կողմից պետական բյուջե վճարված գումարների վերաբերյալ ցանկը: 1000 խոշոր հարկատուրները վճարել են ավելի քան 260 մլրդ 170 մլն դրամ։

Հրապարակված ցուցանիշների համաձայն՝ խոշոր հարկ վճարողների ցուցակը գլխավորում է «Գազպրոմ Արմենիան»։ Ընկերության կողմից պետական բյուջե է վճարվել 18.7 մլրդ դրամ՝ 2020թ. համադրելի ցուցանիշի համեմատ արձանագրվել է անկում՝ 5.24%-ով կամ 0.93 մլրդ դրամով։ 2020թ.-ին I (առաջին) եռամսյակում «Գազպրոմ Արմենիան» նույնպես առաջինն էր։

Երկրորդ տեղում է ՀՀ ՊՆ աշխատակազմը՝ 15.051 մլրդ դրամ։ Նախարարություններն ու պետական այլ մարմիններն առաջին անգամ են ներառվում ցուցակում։

Եռյակը եզրափակում է Զանգեզուրի պղնձամոլիբդենային կոմբինատը՝ 9.77 մլրդ դրամ հարկ՝ 2020թ. համադրելի ցուցանիշի համեմատ՝ +6.29 մլրդ կամ 180.8%։ 2020թ I եռամսյակում ընկերությունը վեցերորդն էր։

Չորրորդ տեղում է «Ինտերնեյշնլ Մասիս Տաբակը», որը պետբյուջե է վճարել 4.14 մլրդ դրամ հարկ՝ 2020թ. համադրելի ցուցանիշի համեմատ արձանագրվել է անկում՝ 1.24 մլրդ դրամով կամ 23.04%-ով։ 2020թ. I եռամսյակում ընկերությունը 3-րդն էր։

«Գեոպրոմայնինգ Գոլդը» 5-րդ հորիզանականում է, ընկերությունը բյուջե է մուծել 3.77 մլրդ դրամ հարկ, 2020թ. համադրելի ցուցանիշի համեմատ արձանագրվել է աճ 1 մլրդ դրամով կամ 36.31%-ով։ 2020թ. I եռամսյակում ընկերությունը 11-րդն էր։

Վեցերորդ տեղում է «ՄՏՍ Հայաստանը»՝ 3.55 մլրդ դրամով և արձանագրած 0.35 մլրդ կամ 8.9% անկմամբ։ 2020թ. I եռամսյակում ընկերությունը 5-րդն էր։

«Գրանդ Տոբակոն» յոթերորդն է՝ 3.14 մլրդ դրամ՝ -12.18 մլրդ կամ -79.5%։ 2020թ I եռամսյակում ընկերությունը ցուցակի 2-րդ հորիզոնականում էր։

«Ֆլեշն» 8-րդն է՝ 3.06 մլրդ դրամ՝ -0.11 մլրդ դրամ կամ -3.63%։ 2020թ. I եռամսյակում ընկերությունը ցուցակի 9-րդ հորիզոնականում էր։

«Ֆիլիպ Մորիս Արմենիան» իններորդն է՝ 2.61 մլրդ դրամ՝ -0.85 մլրդ դրամ կամ -24.71%։ 2020թ I եռամսյակում ընկերությունը ցուցակի 7-րդ հորիզոնականում էր։

«ՍիՓիԷս Օիլը» եզրափակում է տասնյակը՝ 2.58 մլրդ դրամ՝ -1.76 մլրդ դրամ կամ -40.57%։ 2020թ I եռամսյակում ընկերությունը ցուցակի 4-րդ հորիզոնականում էր։

Առաջին տասնյակում տեղ զբաղեցրած ընկերություններից 3-ը ներկայացնում են էներգակիրների, 3-ը՝ ծխախոտագործության, 2 ընկերությամբ ներկայացված է հանքարդյունաբերության, և մեկ ընկերությամբ` հեռահաղորդակցության ոլորտները։ Տասնյակում տեղ է զբաղեցրել նաև մեկ պետական մարմին։

Սամվել Ալեքսանյանին պատկանող «ՍԻԹԻ» ընկերությունը, որը միավորում է «Երեւան ՍԻԹԻ» սուպերմարկետների ցանցը, նույնպես կտրուկ նվազեցրել է պետական վճարումները՝ 2 մլրդ 153 մլրդ դրամից դարձնելով 1 մլրդ 747 մլրդ դրամ։ Գործարարին պատկանող մյուս՝ «Ալեքս ընդ հոլդինգը» հարկերը նվազեցրել է ավելի քան 550 մլն դրամով։

Հարկերը տասն անգամ նվազեցրել եւ 2.5 մլրդ դրամից 241 մլն դրամի է հասցրել «Արմենիա միջազգային օդանավակայանները»։

Ընդհանուր առմամբ, 10 խոշոր հարկատուների կողմից վճարվել է 66.38 մլրդ դրամ հարկ, ինչը 2020թ. համադրելի ցուցանիշից ավել է 3.19 մլրդ դրամով կամ 5.05%-ով: Այստեղ պետք է հաշվի առնենք, որ ցուցակում առաջին անգամ ներառվել են պետական մարմիններ, և եթե առաջին տասնյակից հանենք ՀՀ ՊՆ-ն, ապա 2020թ. համանման ցուցանիշի հետ համեմատությունը կունենա հետևյալ տեսքը. անկում 9.32 մլրդ դրամով կամ 14.75%-ով, իսկ նույն մեթոդաբանությամբ հաշված անկումը կազմել է 9.23 մլրդ դրամ կամ 12.21%։ Հայաստանի թե՛ նախկին, թե՛ ներկա օլիգարխներին պատկանող ընկերություններն անցած տարի նվազեցրել են իրենց շրջանառությունը՝ կտրուկ նվազեցնելով նաեւ վճարած հարկերը։

lurer.com