Վերաքննիչ դատարանը մերժել է դատախազին. Մեղրիի քաղաքապետը կշարունակի մնալ ազատության մեջ

Վերաքննիչ դատարանը՝ դատավոր Արմեն Բեկթաշյանի նախագահությամբ, մերժեց դատախազի բողոքը և ուժի մեջ թողեց Մեղրի համայնքի ղեկավար Մխիթար Զաքարյանի կալանավորումը մերժելու մասին առաջին ատյանի դատարանի որոշումը, հաղորդում է փաստաբան Երեմ Սարգսյանը։

Հիշեցնենք՝ վարչապետ Նիկոլ Փաշինյանի՝ Սյունիքի մարզ այցի ժամանակ սյունեցիները թույլ չէին տվել նրան մտնել համայնքներ: Բողոքի ակցիա էր իրականացվել, հնչել էին հայհոյանքներ, վիրավորանքներ։

Նույն օրը Նիկոլ Փաշինյանը Սյունիքի մարզպետարանում խորհրդակցության ժամանակ անդրադարձել էր Մեղրիում տեղի ունեցած միջադեպին։

Փաշինյանը դիմել էր ԱԱԾ տնօրենին ու ՀՀ ոստիկանապետին՝ հանձնարարելով կտրուկ ու հատուկ գործողություններով այս հարցը լուծել, մեղավորներին հանրության համար տեսանելիի ձևով կանչել պատասխանատվության։

ՀՀ քննչական կոմիտեն հայտարարությամբ էր հանդես եկել՝ նշելով, թե քննությամբ ձեռք բերված փաստական տվյալների համաձայն՝ Մեղրի համայնքի ղեկավարը, 2021թ. ապրիլի 21-ին տեղեկանալով ՀՀ վարչապետի կողմից Սյունիքի մարզի Մեղրի և Ագարակ համայնքներ այց կատարելու մասին, հասարակական կարգը կոպիտ կերպով խախտելու դիտավորությամբ, քաղաքապետարանի մի խումբ աշխատակիցների, իրեն և իր մտերիմներին պատկանող մի շարք ընկերությունների աշխատակիցների և իր մերձավոր շրջապատի մի խումբ անձանց, Մեղրի և Ագարակ համայնքների մի շարք բնակիչների մասնակցությամբ կազմակերպել և ղեկավարել է նրանց կողմից կատարված խուլիգանական գործողությունները:

Ըստ ՔԿ-ի՝ Մեղրի համայնքի ղեկավարն է համակարգել է խուլիգանություն կատարող անձանց գործողությունները։

Ձեռք բերված բավարար ապացույցների համակցությամբ՝ 19 անձի մեղադրանք է առաջադրվել, որոնցից 9-ին՝ ՀՀ քրեական օրենսգրքի 258-րդ հոդվածի 3-րդ, 10-ին՝ 258-րդ հոդվածի 1-ին մասի հատկանիշներով: