Այսօր՝ հունիսի 10-ին, ատեղծվածային դեպք է տեղի ունեցել Երևանում: Ժամը 22:10-ի սահմաններում «Աստղիկ» բժշկական կենտրոնից ոստիկանության Մալաթիայի բաժին ահազանգ է ստացվել, որ բժիշկների հերթապահ խումբը կրծքավանդակի ձախ հատվածում հրազենային վնասվածքով իրենց մոտ է տեղափոխել մի քաղաքացու:
Shamshyan.com-ի տվյալներով հիվանդանոց է մեկնել ոստիկանության Մալաթիայի բաժնի օպերատիվ խումբը՝ բաժնի պետ Անդրանիկ Մելոյանի և քրեական հետախուզության բաժանմունքի պետ Սիմոն Հարությունյանի գլխավորությամբ:
Բժիշկները ոստիկաններին հայտնել են, որ վիրավորը ի վիճակի չէ բացատրություն տալու, ու մինչ բժիշկները պայքարում են նրա կյանքի համար, Մալաթիայի ոստիկանները պարզել են, որ վիրավորը Երևան քաղաքի Բաբաջանյան փողոցի բնակիչ, 67-ամյա Ներսես Ղ.-ն է:
Փաստի առթիվ ոստիկանության Մալաթիայի բաժնի հետաքննական բաժանմունքում նյութեր են նախապատրաստվում: Գ. Շամշյանի տեղեկություններով՝ ոստիկանները վիրավորի բնակարանում հայտնաբերել են ինքնաշեն ատրճանակ:
Պարզվում է նաև, թե ինչ հանգամանքներում է Ներսես Ղ.-ն հրազենային վնասվածքը ստացել: Նշանակվել են մի շարք փորձաքննություններ, այդ թվում՝ դատաբժշկական:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
