Վճռաբեկ քրեական դատարանը ոչ մի կերպ չի ցանկանում զբաղվել Վարդենիսի բնակիչ Նարինե Նալբանդյանի գործով, որը 14 տարի անմեղ նստած է «Աբովյան» քրեակատարողական հիմնարկում: Մարդու իրավունքների եվրոպական դատարանը դեռ երկու տարի առաջ՝ 2015 թվականի ապրիլին արձանագրել է, որ պետությունը խախտել է նրանց արդար դատաքննության եւ դատական մարմիններում պաշտպանության իրավունքը, եւ 62 հազար եվրո փոխհատուցում է սահմանել: Հիշեցնենք, որ Նարինե Նալբանդյանը մեղավոր է ճանաչվել 2004 թվականին՝ իր դստեր դասընկերուհու սպանության համար, եւ դատապարտվել է 14 տարվա ազատազրկման: Դեռահաս աղջկան տանջել էին, սպանել եւ նետել հորը, իսկ Նալբանդյանների ամբողջ ընտանիքին` Նարինեին, նրա ամուսնուն եւ աղջկան, Գեղարքունիքի ոստիկանության աշխատակիցները խոշտանգումների էին ենթարկել՝ խոստովանական ցուցմունքներ կորզելով: Հունիսին վճռաբեկ դատարանը բեկանել է դատարանների կայացրած ակտերը Նալբանդյանների գործով եւ որոշում է ընդունել գործն ուղարկել Գեղարքունիքի մարզի ընդհանուր իրավասության դատարան` նոր քննության, իսկ բռնությունների վերաբերյալ` Երեւանի Կենտրոն եւ Նորք-Մարաշ վարչական շրջանների դատարան, որտեղից էլ այն պետք է ուղարկվեր Հատուկ քննչական ծառայություն, որը պետք է քննություն իրականացնի ոստիկանների մասով: Սակայն վճռաբեկ դատարանը մինչ օրս նյութերը չի ուղարկել դատարաններ:
«Գումարները պարտաճանաչ ձեւով տվեցին,- ասում է Նալբանդյանների պաշտպան Սեդա Սաֆարյանը,- վճռաբեկ բողոքները, որոնք ներկայացրել էի հունիսին, բավարարել են, բայց վճռաբեկ դատարանը պետք է գործն ուղարկի նախաքննության, սակայն արդեն 4 ամիս է՝ ձգում է եւ այդ խնդիրը համառորեն չի լուծում»: Փաստաբանի վճռաբեկ բողոքն Արման Մկրտումյանի դարակներում մուշ-մուշ քնած է, եւ ոչ ոք չգիտի, թե ինչու: Տպավորություն է, որ վճռաբեկ դատարանի նախագահը հատուկ տակտիկա է մշակել` ամեն ինչ անել, որպեսզի ՀՀ քաղաքացիները զզվեն սպասելուց, հոգնեն, հուսալքվեն եւ հնարավորինս քիչ դիմեն եվրոպական արդարադատության գերագույն ատյան: Սեդա Սաֆարյանը բողոք է ուղարկել Եվրոպայի խորհուրդ, որում իրազեկում է այս իրավիճակի մասին: «Մի օրինակն էլ մեր նախարարին ենք ուղարկել՝ արդարադատության, որ նա տեղեկացվի, որ վիճակն այսպիսին է: Մենք չենք կարող համառորեն նստել եւ սպասել, թե Նալբանդյան Նարինեն ոնց է 14 տարի անմեղ նստելու»,- ասում է Սեդա Սաֆարյանը:
Նյութի աղբյուրը ` hraparak.am
