ԱԱԾ հատուկ ջոկատայիններն ու ոստիկանության աշխատակիցները այսօր՝ հուլիսի 14-ի առավոտյան մտել են «Զանգեզուրի պղնձամոլիբդենային կոմբինատ» ՓԲԸ–ի վարչական շենք եւ բերման են ենթարկել մի քանի աշխատակիցների:
Տեսանյութում երեւում է, թե ինչպես են բերման ենթարկում աշխատակիցներից մեկին եւ չեն պատասխանում հարցին, թե ուր են տանում եւ ինչու:
Ավելի վաղ NEWS.am-ի հետ զրույցում «Հայաստան» դաշինքի անդամ, «Վերածնվող Հայաստան» կուսակցության նախագահ Վահե Հակոբյանը նշել է, որ ԱԱԾ–ի «Ալֆա» ջոկատն առավոտյան ժամը 10։30–ի սահմանում, առանց համապատասխան որոշման, ներխուժել է կոմբինատի վարչական շենք.«Պատերի ու դարպասների վրայով ներխուժել են շենք, ու սկսել ահաբեկել աշխատակիցներին։ Աշխատակիցներին քաշքշելով հարցաքննության են տարել, թե ինչ է հիմքը, որ նրանց հարցաքննության են տարել, անհասկանալի է։ Մեր իրավաբանն այնտեղ է, բայց նրան արգելում են շփվել աշխատակիցների հետ»,– ասել էր նա:
Վահե Հակոբյանը հիշեցրել է, որ 70–ից ավել հանքանյութով վագոններն են կանգնած, եւ եթե այսպես շարունակվի, պղնձի խտանյութը պահեստավորելու տեղ չեն ունենալու:
