«Հրապարակ». Վտակների վերաբերյալ ինստրուկտաժ չկա

Հովիկ Աբրահամյանին ինչո՞ւ չէիք հրավիրել Հայաստան-Սփյուռք համաժողովին, հարցրինք կարկառուն ՀՀԿ-ականներից մեկին: «Ի՞նչ ստատուսով»: Նախկին վարչապետի: «Հայաստանը հազար նախկին վարչապետ ունի, ո՞ր մեկին հրավիրեինք»: Նախ` «հազար» չէ. ես Խատիսյանին ու Վրացյանին նկատի չունեի, այլ անկախության շրջանի 13 վարչապետերին, հատկապես` Հովիկ Աբրահամյանին, որն էլ եղել է Հայաստան-Սփյուռք 5-րդ համաժողովից (2014) մինչեւ 6-րդ համաժողովի ընթացքի վարչապետ` ուղիղ 2 տարի, Սփյուռքի ու համանուն նախարարության հետ ունեցել է շատ լավ հարաբերություններ: «Դե գիտեք, «գետակ-վտակներ» պոլեմիկայից հետո բոլորն ավելի զգուշավոր են դարձել»: «Զգուշավորները» չգիտե՞ն, որ խոսվում է նաեւ 18-ից հետո նրա հնարավոր փոխվարչապետության մասին` «Ծառուկյան դաշինքի» կոալիցվելու «արդյունքում»: «18-ի մասին` միայն 18-ին, այսօր Հովիկ Աբրահամյանը քաղաքականության մեջ չէ»: