Հայտնի բանկիր, «Открытие» ֆինանսական կորպորացիայի նախկին գլխավոր տնօրեն Ռուբեն Աղանբեկյանի որդին մահացել է։ Mash Telegram ալիքի հաղորդմամբ՝ երիտասարդը մահացել է Մոսկվայում տեղի ունեցած սարսափելի վթարի հետևանքով։
Ըստ տեղեկությունների՝ ճակատագրական վթարը տեղի է ունեցել գիշերը Խամովնիկիում։
23-ամյա Աբել Աղանբեկյանն իր սիրելի «BMW S1000RR» սպորտային մոտոցիկլետը վարելիս է եղել, երբ մի տղամարդ հետիոտնային անցման համար չնախատեսված վայրում անսպասելի հայտնվել է փողոցում։
Տղամարդը գծանցումից 28 մետր առաջ է եղել։ Երիտասարդ բայքերը հետիոտնին չի նկատել, վրաերթի է ենթարկել նրան, ու ինքն էլ մոտոցիկլետից թռել է։ Վրաերթի ենթարկված տղամարդը մահացել է մինչ շտապօգնության ժամանումը։ Իսկ Աբել Աղանբեկյանը հոսպիտալացվել է գանգոսկրի հիմնային կոտրվածքով և այլ վնասվածքներով։
Նրա կյանքը փրկելու բժիշկների բոլոր ջանքերն ապարդյուն են եղել։ Մոտ 5 ժամ անց երիտասարդը մահացել է։
