Սերժ Սարգսյանի եղբորորոդու՝ Հայկ Ալեքսանդրի Սարգսյանի դեմ ցուցմունք տված, նրա նախկին մտերիմ ընկեր, «Կենտրոնի Կյաժ» մականունով հայտնի Դավիթ Սիմոնյանի նկատմամբ պաշտպանության միջոց է կիրառվել:
Սիմոնյանը, որը մեկ այլ գործի շրջանակում մի քանի ամիս գտնվում էր կալանքի տակ, Հայկ Սարգսյանի դեմ ցուցմունք տալուց հետո ազատ էր արձակվել: Ազատ արձակվելուց հետո էլ նրա նկատմամբ պաշտպանության միջոց է կիրառվել:
Դավիթ Սիմոնյանն այսօր Երեւան քաղաքի ընդհանուր իրավասության դատարան էր ներկայացել ՀՀ ոստիկանության 6-րդ վարչության աշխատակիցների ուղեկցությամբ: Այսօր նրան առնչվող քրեական գործով առաջին դատական նիստն էր:
Նախկինում իր ակտիվությամբ աչքի ընկած (Ընտրախախտումներ կատարելու, լրագրողների աշխատանքը խոչընդոտելու, ակտիվիստներին ծեծի ենթարկելու) Կյաժն այսօր որոշել էր քար լռություն պահպանել: Լրագրողների հարցին ի պատասխան նա միայն ասաց, որ իր անվտանգության հետ կապված խնդիր ունի եւ մշտապես ոստիկանության աշխատակիցների հսկողության ներքո է: Մեր հարցին, թե Հայկ Սարգսյանի դեմ ցուցմունք տալուց հետո՞ է նման խնդիր առաջացել, Սիմոնյանը չպատասխանեց, նրան 6-րդ վարչության աշխատակիցները շտապեցին հեռացնել նիստերի դահլիճից: Արդեն նիստերի դահլիճում լրագրողները կրկին մի քանի ճշտող հարց տվեցին Սիմոնյանին, մասնավորապես, թե ինչո՞ւ Հայկ Սարգսյանի գործով դատարան չի ներկայանում. այդ եւ այլ հարցերի Սիմոնյանը եւս չպատասխանեց:
Ալեքսանդր Սարգսյանի որդու դեմ ցուցմունք տված Դավիթ Սիմոնյանը մեղադրվում է թմրանյութ իրացնելու մեջ: Ըստ մեղադրանքի՝ Սիմոնյանը 2017թ. դեկտեմբերի 19-ին` ժամը 13:40-ի սահմաններում, իրացնելու նպատակով Էդուարդ Թոռնիկի Ղազարյանից ապօրինի ձեռք է բերել եւ պահել ընդհանուր 25.72 գրամ մարիխուաննա տեսակի թմրամիջոց, որից Գոռ Համբարձումյանին ապօրինի իրացրել է զգալի չափերով` 3.56 գրամ քաշով մարիխուաննա տեսակի թմրամիջոց եւ 0.015 գրամ բուսական մանրացված զանգվածի եւ ծխախոտի մասնիկների խառնուրդ, Լեւոն Սերգեյի Գաբրիելյանին ապօրինի իրացրել է զգալի չափերով՝ 0.42 գրամ քաշով մարիխուաննա տեսակի թմրամիջոց, իսկ մնացած 21.74 գրամ մարիխուաննա տեսակի թմրամիջոցը իրացման նպատակով ապօրինի պահել է իր կողմից վարվող ավտոմեքենայում:
Սիմոնյանի նկատմամբ այս գործի շրջանակներում արդեն որպես խափանման միջոց է ընտրվել չհեռանալու մասին ստորագրությունը: Այս գործով, բացի Դավիթ Սիմոնյանից, ամբատանյալի աթոռին են գտնվում եւս երկուսը, սակայն միայն մեկն է գտնվում կալանքի տակ, քանի որ մեղադրվում է առանձանպես խոշոր չափերի թմրամիջոցի իրացման մեջ:
Դատական այսօրվա նիստը, սակայն, երկար չտեւեց. ամբաստանյալներից մեկը, որն ազատության մեջ է, դատարան չէր ներկայացել, ու դատարանը, նախագահությամբ դատավոր Տաթեւիկ Գրիգորյանի, հետաձգեց գործի քննությունը՝ միաժամանակ ամբաստանյալին բերման ենթարկեու որոշում կայացնելով:
Խոսքը ամբաստանյալ Էդուարդ Թոռնիկի Ղազարյանի մասին է: Վերջինիս մեղադրանք է առաջադրվել այն բանի համար, որ նա, չպարզված ժամանակ եւ հանգամանքներում, իրացնելու նպատակով քննությամբ չպարզված անձից ապօրինի ձեռք է բերել եւ պահել առանձնապես խոշոր չափերով բուպրենորֆին, հաշիշ եւ մարիխուաննա տեսակի թմրամիջոցներ, որից խոշոր չափերով ապօրինի իրացրել է Դավիթ Սիմոնյանին:
Մյուս ամբաստանյալը՝ Գոռ Արմենի Համբարձումյանը, մեղադրվում է այն բանում, որ 2017թ. դեկտեմբերի 20-ին, առանց իրացնելու նպատակի, իր անձնական օգտագործման նպատակով Դավիթ Սիմոնյանից ապօրինի ձեռք է բերել և պահել զգալի չափերով` ընդհանուր 3.56 գրամ մարիխուաննա թմրամիջոց:
Մեր զրույցում Դավիթ Սիմոնյանի պաշտպան Գիվի Հովհաննիսյանը նշեց, որ իր պաշտպանյալն առաջադրված մեղադրանքը չի ընդունում եւ ցուցմուք է տվել: Մեր հարցին, թե Սիմոնյանն ի՞նչ հարաբերություններ ունի Ալեքսանդր Սարգսյանի որդու հետ, պաշտպանի խոսքով, ինքը չգիտի: Պաշտպանը չպատասխանեց նաեւ հարցերին, թե ինչու է Սիմոնյանը մտահոգված իր անվտանգության համար, ինչու է 11 տարի անց որոշել հանցագործության մասին հաղորդում ներկայացնել Հայկ Սարգսյանի վերաբերյալ:
Հայաստանում տեղի ունեցած թավշյա հեղափոխությունից հետո Սիմոնյանը հանցագործության մասին հաղորդում է տվել իր ընկերոջ` Հայկ Սարգսյանի դեմ՝ նշելով, թե վերջինս 11 տարի առաջ փորձել է իրեն սպանել: Այս հաղորդումից հետո քրեական գործը վերաբացվեց եւ Սարգսյանը կալանավորվեց: Սարգսյանը, սակայն, երկար չմնաց կալանքի տակ, նա գրավի դիմաց ազատ արձակվեց: Ալեքսանդր Սարգսյանի որդին նույնպես չի ընդունում մեղադրանքը եւ արդարադատություն է ակնկալում: Այս գործով դատարանը որոշում է կայացրել տուժող Սիմոնյանին բերման ենթարկելու վերաբերյալ, քանի որ վերջինս չէր ներկայանում դատական նիստերին:
Աղբյուրը՝ Armlur.am
