Վահագն Մարուքյանը նշեց, որ ազատության մեջ իր գերխնդիրը լինելու է իր անմեղությունն ապացուցելը:
«Ինձ 1993-ին բերման են ենթարկել, քննիչի ներկայությամբ իմ գլխին սարքել են, ես սա եմ ապացուցելու: Էս ամեն ինչը Հատուկ կարևոր գործերով քննիչ Անդրանիկ Միրզոյանի ձեռքի գործն է, 25 տարի էս օրվան եմ սպասել, պայքարելու եմ արդարացման համար, չէ, հանգիստ չեմ նստելու, ես մինչև վերջ պայքարելու եմ։ Ինձ ստիպել են խոստովանական ցուցմունք տալ, կրակել են, ապացուցելու եմ»,-նկատեց նա:
Հիշեցնենք, որ Վահագն Մարուքյանը մեղավոր է ճանաչվել Վանաձորի Ռազմական ոստիկանության պետի դիտավորյալ սպանության մեջ: Նա կալանավորվել է 1993-ին՝ 19 տարեկանում: Մարուքյանը դատապարտվել է մահապատժի, իսկ 2003-ից մահապատիժը փոխարինվել է ցմահ ազատազրկմամբ:
Վերջերս նա հացադուլ էր հայտարարել, բաց նամակով դիմել էր նաև վարչապետի պաշտոնակատար Նիկոլ Փաշինյանին:
