2 Օգոստոսի, 2022
Քրեական ոստիկանության թմրամիջոցների անօրինական շրջանառության դեմ պայքարի վարչության ծառայողները հերթական օպերատիվ տեղեկությունն են ստացել, որն իրացրել են Սյունիքի մարզային վարչության, Կապանի և Մեղրիի բաժինների գործընկերների հետ:

Ինչպես տեղեկացրին ՀՀ ոստիկանությունից, հուլիսի 29-ին, առավոտյան ժամը 4.30-ին, Կապանի Ձորք թաղամասի բենզալցակայանում իրավապահները կանգնեցրել են Արցախում հաշվառված 56-ամյա մի տղամարդու վարած «ԳԱԶ-24» մակնիշի ավտոմեքենան, որի մեջ եղել է երկու ուղևոր: «Վարորդը, չենթարկվելով ոստիկանների օրինական պահանջին, փախուստի փորձ արեց` մեքենայով հարվածելով ոստիկանական «Նիվային» և էլի երկու մեքենայի: Քանի դեռ «ԳԱԶ-24-ը» աքցանի մեջ էր, ոստիկաններին հաջողվում է մեքենայից հանել ուղևորներին` նույնպես Արցախում հաշվառված 45 և 55 տարեկան տղամարդկանց: Սրանից հետո էլ փախուստը շարունակող վարորդը «ԳԱԶ-24-ով» բախվում է բենզալցակայանի պատին:

Իրավիճակը վերահսկելի դարձնելուց հետո իրավապահները զննեցին ուղևորներից մեկի պայուսակը, որի մեջ հայտնաբերվեց մարիխուանա և էլեկտրոնային փոքր կշեռք:
Երեքն էլ ձերբակալվեցին: Նախաձեռնվեց քրեական վարույթ: Նույն օրը, դատարանի որոշմամբ, խուզարկվեց «Վոլգան»: Հայտնաբերվեց 500 գրամ ափիոն և 455 գրամ հաշիշ:
Ուղևորներից 45-ամյա տղամարդը հայտնեց, որ հայտնաբերվածն իրենն է: Խուզարկություն կատարվեց նաև Երևանում գտնվող նրա բնակության վայրում։ Հայտնաբերվեցին մարիխուանա և սուբուտեքսի կտորներ»,- ասվում է հաղորդագրության մեջ:

Ըստ աղբյուրի՝ երեք տղամարդն էլ կալանավորվել են, նշանակվել են դատանյութագիտական փորձաքննություններ: Նախաքննությամբ հանգամանքները պարզվում են:

Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

kotayk

Լրահոս