Վրաստանի ներքին գործերի նախարարության միգրացիայի վարչության և նախարարության այլ ստորաբաժանումների սերտ համագործակցության արդյունքում՝ անցած ամսվա ընթացքում Վրաստանից վտարվել է տարբեր երկրների 97 քաղաքացի։ Jnews-ի հաղորդմամբ, տեղեկությունը տարածում է ՆԳՆ-ը։
Տվյալ օտարերկրյա քաղաքացիներից մի մասը ինքնակամ է լքել Վրաստանը, իսկ մյուս մասը՝ միգրացիայի վարչության աշխատակիցների կողմից իրականացված միջոցառումների արդյունքում վտարվել է հարկադրաբար։ Վտարված անձանց, ըստ օրենսդրության, արգելվել է կրկին մուտք գործել Վրաստանի տարածք։
Վտարվածների թվում են Հնդկաստանի, Բելառուսի, Չինաստանի, Տաջիկստանի, Ադրբեջանի, Ռուսաստանի, Բանգլադեշի, ԱՄՆ-ի, Իրաքի, Իրանի, Նիգերիայի, Թուրքմենստանի, Թուրքիայի, Եգիպտոսի, Պակիստանի, Կամերունի, Հորդանանի և Ղրղզստանի քաղաքացիներ։ Ընդհանուր առմամբ՝ 97 մարդ։
Նշվում է, որ Վրաստանի ՆԳՆ միգրացիայի վարչությունը հանդիսանում է այն մարմինը, որը պատասխանատու է երկրում անօրինական միգրացիայի դեմ պայքարի համար։ Նրա լիազորություններից է հայտնաբերել առանց իրավական հիմքի գտնվող օտարերկրյա քաղաքացիներին և իրականացնել նրանց վտարումը Վրաստանից։
