«Դիտում եմ արտաքին հարաբերությունների հանձնաժողովի ղեկավարի ընտրության վերաբերյալ խորհրդարանական նիստի հեռարձակումը եւ ուղղակի ապշած եմ, թե ոնց են իշխանական պատգամավորները կրկին կործանանար օրակարգ բերում՝ փորձելով ինչ-որ կերպ արդարացնել թուրք-ադրբեջանական տանդեմին առաջիկա աղետալի զիջումները: Դա, պարզապես, ցնցող է, չնայած՝ հաշվի առնելով ներկայիս կառավարության խնդիրների առաջնահերթությունը, այն է՝ ամեն գնով ամրապնդել կապիտուլյացիան (դեմարկացիա, Սյունիքի միջոցով թուրքերի եւ ադրբեջանցիների ճանապարհային հաղորդակցության բացում, Թուրքիայում եւ Ադրբեջանում դիվանագիտական հարաբերությունների հաստատման նախապատրաստում… եւ այլն), այնքան էլ զարմանալի չէ, ավելին՝ սպասելի է:
Այսօր մենք ոչ մի հասկանալի խոսք չենք լսել իշխանամետ պատգամավորներից, թե ինչպես է Հայաստանի խորհրդարանը վերականգնելու Արցախի Հանրապետության տարածքային ամբողջականությունը, ինչպես են վերադարձվելու հայ ռազմագերիները, երբ եւ ինչպես են թուրք-ադրբեջանական օկուպացիոն զորքերը հեռացվելու Հայաստանի տարածքից, արդյոք 44-օրյա պատերազմի ընթացքում մարդկության դեմ հանցագործությունների համար միջազգային դատարան կբերվեն Ադրբեջանը և Թուրքիան, արդյոք միջազգային ասպարեզում քայլեր կկատարվեն պատերազմի հանցագործներին եւ ահաբեկիչներին Հայաստանին արտահանձնելու համար: Փոխարենը, ականատես եղանք, թե ինչպես, իմ կարծիքով, իշխանությունները բացարձակապես չեն հասկանում կամ չեն ցանկանում հասկանալ Հայաստանի եւ Արցախի իրական սպառնալիքները:
Եվ որպես վերջին օրերի լեյտմոտիվ, երեկ ադրբեջանական զորքերը ականանետերից գնդակոծել են հայկական դիրքերը, այսօր կիրառվել են հարվածային անօդաչու թռչող սարքեր: Այսինքն ՝ տեղի է ունենում թուրքերի եւ ադրբեջանցիների կողմից ռազմական սադրանքների ավելացում:
Հասկանալի է, որ թուրք-ադրբեջանական տանդեմը նպատակ ունի վարկաբեկել ռուս խաղաղապահների ռազմական առաքելությունը:
Բայց այս մասին չլսեցինք խորհրդարանում, մենք պարզապես կրկին ականատես ենք դառնում, թե ինչպես է խորհրդարանի ամբիոնից իշխանությունների խելացի խոսքերի հետեւում թաքնվում իրական սպառնալիքներն ու մարտահրավերները հասկանալու բացարձակ բացակայությունը», – գրել է ԱԺ յոթերորդ գումարման «Բարգավաճ Հայաստան» խմբակցության քարտուղար Արման Աբովյանը:
