Այսօր՝ նոյեմբերի 12-ին, վրաերթ է տեղի ունեցել Երևանում։ Ժամը 11։30-ի սահմաններում Toyota Land Cruiser մակնիշի 10 ՕD 100 համարանիշի ավտոմեքենայի վարորդը Բադալ Մուրադյան փողոցում՝ «Իդեալ Վալան Պրոֆ» շինության դիմաց վրաերթի է ենթարկել փողոցը չթույլատրելի հատվածով անցնող հետիոտնին, shamshyan.com։
Վարորդը փախուստի չի դիմել, ահազանգել է 1-03 և օգնել է վրաերթի ենթարկված կնոջը տեղափոխվել «Սուրբ Գրիգոր Լուսավորիչ» բժշկական կենտրոն։
Ոստիկանությունն ու քննչական բաժինը պարզում են վարորդի և վիրավորի ինքնությունը։
Դեպքի վայրում հավաքվածները Shamshyan.com–ին ասել են, որ վարորդը եղել է նախկին Ազգային Անվտանգության Խորհրդի քարտուղար Արթուր Բաղդասարյանի հայրը՝ Վահան Բաղդասարյանը։
Tert.am-ը փորձեց տեղեկությունը ճշտել «Հայկական վերածնունդ» կուսակցությունից, սակայն այս քաղաքական ուժի կուսակցականներից և ոչ մեկը չի պատասխանում հեռախոսազանգերին:
Tert.am –ի հետ զրույցում Ճանապարհային ոստիկանությունից ավտովթարի փաստը հաստատեցին, սակայն անձերի վերաբերյալ հրաժարվեցին տեղեկատվություն հայտնել:
Tert.am–ի աղբյուրներից, սակայն, հայտնի դարձավ, որ մեքենան, որը ներգրավված է ավտովթարում պատկանում է Բաղդասարյանի հորը, ինչը հաստատեցին նաև «Հայկական վերածնունդ» կուսակցությունից:
