Գավառ քաղաքի առաջնորդանիստ Սուրբ Աստվածածին եկեղեցում կատարվեց Հրաշափառի կարգ՝ Հայ Առաքելական եկեղեցու Գեղարքունյաց թեմի առաջնորդ Տեր Պարթև եպիսկոպոս Բարսեղյանին դիմավորելու համար։ Հայտնում են Գեղարքունիքի մարզպետարանից։
Վերջերս ձեռամբ Ն․Ս․Օ․Տ․Տ. Գարեգին Երկրորդ Ծայրագույն պատրիարք և Ամենայն Հայոց կաթողիկոսի, եպիսկոպոսության աստիճան է շնորհվել Գեղարքունյաց թեմի առաջնորդ Տեր Պարթև վարդապետ Բարսեղյանին։
Թեմի առաջնորդին եպիսկոպոսական կոչումով առաջնորդանիստ եկեղեցում դիմավորելու համար կատարվեց Հրաշափառի կարգը, որին մասնակցեցին Գեղարքունյաց թեմի հոգևոր դասի անդամները, Գեղարքունիքի մարզպետի տեղակալներ Ջանիկ Բազեյանը և Վահան Զարոյանը, Գավառ համայնքի ղեկավար Գուրգեն Մարտիրոսյանը, Գեղարքունիքի մարզպետի և Գավառի համայնքապետարանի աշխատակազմերի աշխատակիցներ, հանրապետական գործադիր մարմինների տարածքային ծառայունների ղեկավարներ, առողջապահական ու կրթամշակութային հաստատությունների ներկայացուցիչներ, հավատավորներ։
Տեր Պարթև եպիսկոպոս Բարսեղյանին Գեղարքունիքի մարզպետ Կարեն Սարգսյանի և Գավառ համայնքի ղեկավար Գուրգեն Մարտիրոսյանի անունից ողջույնի ու շնորհավորանքի խոսքեր հղեցին Գեղարքունիքի մարզպետի տեղակալ Ջանիկ Բազեյանը և Գավառ համայնքի ղեկավարի առաջին տեղակալ Գրիգոր Դաշտոյանը, վստահեցնելով, որ Գեղարքունյաց աշխարհի հոգևոր ու աշխարհիկ իշխանությունների համագործակցությունն այսուհետ էլ կծառայի ի շահ մեր հայրենիքի ու ժողովրդի, ի շահ հայրենի հավատի պահպանման ու զորացման։
Հրաշափառի կարգի ավարտին ներկաներին իր հայրական օրհնությունը բերեց Հայ Առաքելական եկեղեցու Գեղարքունյաց թեմի առաջնորդ Տեր Պարթև եպիսկոպոս Բարսեղյանը։
