Հայաստանի իշխանությունները շարունակում են «երկու աթոռի վրա նստելու» քաղաքականությունը։ Այս հայտարարությունն արել է ՌԴ նախագահի օգնական Յուրի Ուշակովը` մեկնաբանելով Երևանում տեղի ունեցած վերջին միջոցառումները, այդ թվում՝ Եվրոպական քաղաքական համայնքի գագաթնաժողովը:
Ուշակովը նշել է, որ ապրիլին Մոսկվայում Վլադիմիր Պուտինի և Նիկոլ Փաշինյանի հանդիպման ժամանակ քննարկվել ու պարզաբանվել են բոլոր հարցերը։
«…Բայց Երևանում, ցավոք, փորձում են շարունակում են «երկու աթոռի վրա նստելու» քաղաքականություն վարել: Թե որքան երկար կարելի է մնալ նման դիրքում, ես չգիտեմ»,- ասել է նախագահի օգնականը:
Ուշակովն այսպիսով պատասխանել է այն հարցին, թե Մոսկվայում ինչպես են ընկալել Երևանի վերջին միջոցառումները, այդ թվում՝ Հայաստանի և Մեծ Բրիտանիայի միջև ռազմավարական գործընկերության մասին հռչակագրի ստորագրումը, և արդյոք Կրեմլում դա չեն դիտարկում որպես Ռուսաստանի հետ գործակցությունը խզելու ճանապարհ:
«Այս ամենը, իհարկե, վնասում է մեր երկկողմ հարաբերությունների զարգացմանը, որոնք այնքան շահավետ են թե՛ Ռուսաստանի, թե՛ Հայաստանի համար: Ես կասեի, որ դա ավելի շահավետ է մեր հայ ընկերների համար, քան նույնիսկ մեզ համար»,- հավելել է նա:
ՌԴ նախագահի օգնականը հիշատակել է բարենպաստ իրավիճակը, մասնավորապես՝ տնտեսական զարգացման հարցում: Այդ իրավիճակը մեծապես կապված է Ռուսաստանի և ԵԱՏՄ-ի հետ Հայաստանի սերտ տնտեսական հարաբերությունների հետ:
