Չինաստանի կարգավորիչը կոչ է արել երկրի խոշոր պետական ընկերություններին դադարեցնել հեղուկ բնական գազի (LNG) վերավաճառքը Եվրոպայում, ինչպես նաև ասիական այլ երկրների գնորդներին, հայտնում է Bloomberg-ը՝ հղում անելով աղբյուրներին:
«Զարգացման և բարեփոխումների ազգային հանձնաժողովը՝ երկրի գլխավոր տնտեսական մարմինը, PetroChina Co-ին, Sinopec-ին և Cnooc Ltd.-ին կարգադրել է պահել ձմեռային բեռները ներքին օգտագործման համար»,- գործակալությանը հայտնել են աղբյուրները:
Պետական ընկերությունները, ինչպես նաև կարգավորող մարմինը գործակալությանը չեն մեկնաբանել այս տեղեկությունը:
Bloomberg-ը նշում է, որ Չինաստանը հեղուկ գազ գնելու մեծ պայմանագրեր ունի այնպիսի արտահանողների հետ, ինչպիսին ԱՄՆ-ն է, և այս տարի տեղական առևտրականները այդ մատակարարումների մի մասը ուղղել են Եվրոպա՝ ներքին ցածր պահանջարկի պատճառով:
Ինչպես հավելում է գործակալությունը, Չինաստանի նման քայլերը կարող են հանգեցնել Եվրոպա հեղուկ գազի մատակարարման կրճատմանը և ցուրտ ձմռան դեպքում այնտեղ սրել էներգետիկ ճգնաժամը։
Սերբիայի կառավարությունը նույնպես որոշել է ժամանակավորապես արգելել բնական գազի արտահանումը, հայտնում է РИА Новости-ն՝ երկրի կաբինետի մամուլի ծառայությանը հղումով։
