2023 թվականի փետրվարի 21-ին Շիրակի մարզպետ Մուշեղ Մուրադյանի գլխավորությամբ Արթիկի համայնքապետարանում տեղի է ունեցել արտագնա խորհրդակցություն՝ Արթիկի համայնքի ղեկավար Անան Ոսկանյանի, մարզային ու համայնքային իշխանությունների ներկայացուցիչների մասնակցությամբ:
Ողջունելով ներկաներին՝ Շիրակի մարզպետը նշել է, որ այցելությունները համայնքներ շարունակական բնույթ են կրելու և նպատակ ունեն համատեղ աշխատանքն առավել առարկայական դարձնել․ «Ինձ համար կարևոր է այցելել համայնքներ, տեղում շփվել պատասխանատուների, քաղաքացիների հետ, լսել նրանց մտահոգություններն ու խնդիրները, դրանց լուծման ուղղությամբ ձեռնարկվելիք քայլերի մասին նրանց դիտարկումները։ Անմիջական քննարկումներով ու այցելություններով կկարողանանք առավել արագ գտնել համայնքային խնդիրների լուծման ուղիներն ու համատեղ աշխատանքով քայլ-քայլ գնալ առաջ»։
Արթիկ համայնքի ղեկավար Անան Ոսկանյանը շնորհակալություն է հայտնել այցի համար և անդրադարձել անցած մեկ տարվա ընթացքում իրականացված աշխատանքներին, որից հետո համայնքապետարանի պատասխանատուներն ըստ ոլորտների զեկուցել են իրականացված ծրագրերի մասին։ Խորհրդակցության ընթացքում անդրադարձ է կատարվել 2023 թվականին Արթիկ համայնքում իրականացվելիք սուբվենցիոն ծրագրերին։ Մարզպետին է զեկուցվել, որ համայնքի կողմից 2023 թվականին, ըստ նախնական տվյալների, շուրջ 695 մլն դրամի սուբվենցիոն ծրագրեր են ներկայացվել։ Նախատեսվում է Արթիկ քաղաքի 15 բազմաբնակարան շենքերի տանիքների վերանորոգման, ճանապարհաշինական, մանկապարտեզների շենքերի հիմնանորոգման աշխատանքների իրականացում։
Կարևորելով պետական բյուջեի յուրաքանչյուր լումայի նպատակային ծախսումը՝ մարզպետը պատասխանատուներին հորդորել է սուբվենցիոն ծրագրեր ներկայացնել հենց առաջնային լուծում պահանջող խնդիրների համար, ուշադրություն դարձնել ծրագրային փաթեթներին՝ անճշտությունները բացառելով, աշխատանքներն իրականացնելիս լինել աչալուրջ, դրանք կատարել որակով և ժամանակին։
Սեփական եկամուտների հավաքագրմանն ուղղված աշխատանքների ինտենսիվությունը կարևորելով՝ Մուշեղ Մուրադյանն ընդգծել է, որ անհրաժեշտ է լինել առավել հետևողական, քանի որ եկամուտների հավաքագրումը կնպաստի համայնքի զարգացմանը, գումարները կուղղվեն համայնքային խնդիրների լուծմանը։ Հանդիպմանն անդրադարձ է եղել համայնքում բիզնես միջավայրի ակտիվացմանը, պետություն-մասնավոր հատվածի համագրծակցության խորացմանը, առողջապահական, կրթական-մշակութային ոլորտներին առնչվող, ինչպես նաև ընթացիկ մի շարք այլ հարցերի։
։
Աղբյուրը՝ Շիրակի մարզպետարան
