«Փաստ» օրաթերթը գրում է.
«Տավուշը՝ հանուն Հայրենիքի» շարժումը, որը համազգային բնույթ է ստանում, մեր տեղեկություններով, լրջորեն անհանգստացրել է իշխանություններին։ Կառավարության մեր աղբյուրի փոխանցմամբ, այս օրերին իշխանությունները գրեթե 24-ժամյա ռեժիմով լուրջ հաշվարկների մեջ են, թե առաջիկայում ի՞նչ զարգացումներ կարող է ունենալ շարժումը, հատկապես մայիսի 8-ի երեկոյան և 9-ին ի՞նչ քանակի մասնակիցներ կլինեն, որքանո՞վ կաշխատի «ձնագնդի էֆեկտը» և այլն։
Ավելին, նրանք շատ լավ հասկանում են, որ ցանկացած պահի փողոցում կարող են տեղի ունենալ շրջադարձային իրադարձություններ, ինչի արդյունքում պարզապես կկորցնեն իշխանությունը, ուստի, փորձում են մոբիլիզացնել հնարավոր բոլոր մեթոդներն ու վարչական ռեսուրսը՝ կանխելու այդ զարգացումները։ Թերթի աղբյուրը հայտնում է, որ, ի թիվս այլ նախապատրաստական աշխատանքների, մասնավորաբար ԿԳՄՍ նախարարությունը շրջաբերական է ուղարկել բոլոր դպրոցների տնօրեններին և հանձնարարել, որ հնարավոր բոլոր տարբերակներով կանխեն աշակերտների մասնակցությունը սպասվող ցույցերին։ Ընդ որում՝ անկախ նրանից՝ դասի ժամ կլինի, թե դասերից հետո կամ հանգստյան օրերին:
