Մենք վերականգնեցինք արդարությունը, միջազգային իրավունքը, մեր ինքնիշխանությունը, տարածքային ամբողջականությունը, ապա հասանք խաղաղության։ Եվ հետո մենք կանգ առանք։ Եվ երեսուն տարի տառապած երկրի ղեկավարի համար ճիշտ պահին կանգ առնելը շատ պատասխանատու և շատ կարևոր որոշում է:
Այս մասին ասել է Ադրբեջանի նախագահ Իլհամ Ալիևը՝ Դավոսում «Եվրասիայի տնտեսական ինքնության սահմանումը» թեմայով քննարկման ժամանակ ելույթ ունենալով։
Մենք կարող էինք շարունակել։ Ես շատ անկեղծորեն հայտարարում եմ ձեզ և մեր ամբողջ լսարանին. սա կհանգեցներ պատերազմների անվերջ շարքի, ավելի մեծ տառապանքների, ավելի շատ զոհերի, և այդ դեպքում պատերազմը երբեք չէր ավարտվի։ Բայց ինչ-որ մեկը պետք է կանգնեցներ այն, և մենք որոշեցինք դա անել։ Այո, դա Հայաստանի և Ադրբեջանի ղեկավարության համատեղ որոշումն էր՝ փակել այս էջը և ուսումնասիրել խաղաղության հնարավորությունները։ Եվ մենք, ինչպես ասացի՝ կարծում եմ՝ ռեկորդային արագությամբ կարողացանք 2023 թվականի սեպտեմբերին ռազմական բախումից անցնել 2025 թվականի օգոստոս, երբ Հայաստանի վարչապետի հետ ստորագրեցինք համատեղ հռչակագիր, և խաղաղության համաձայնագիրը նախաստորագրվեց նախագահ Թրամփի ներկայությամբ։ Նախագահ Թրամփը հռչակագիրը ստորագրեց որպես վկա, և, ինչպես ասացի, մենք այս պատերազմն ավարտեցինք աշխարհի թիվ մեկ գրասենյակում,-եզրափակել է Ալիևը:
