Մխչյան գյուղի միջնակարգ դպրոցում տարրական դասարանի երկու երեխայի թմրանյութ տալու գործով չորրորդ մեղադրյալը հայտնաբերվել և արգելանքի է վերցվել․ նա նույնպես անչափահաս է

19 Մայիսի, 2025

Արարատի մարզի Մխչյան գյուղի միջնակարգ դպրոցում չորրորդ դասարանի երկու երեխայի թմրանյութ տալու գործով չորրորդ մեղադրյալը, որին իրավապահները փնտրում էին, հայտնաբերվել և արգելանքի է վերցվել։ Վերջինս անչափահաս է։

Հիշեցնենք, որ Մխչյան գյուղի միջնակարգ դպրոցում օրերս զարհուրելի դեպք է եղել։ Ըստ տեղեկությունների՝ բարձր դասարանների մի քանի տղաներ դպրոցի զուգարանում կապկպել են 4-րդ դասարանի երկու աշակերտի և ստիպողաբար թմրանյութ տվել, որից հետո երեխաների մոտ կախվածություն է առաջացել, նրանք սկսել են տնից գումար գողանալ՝ կրկին նույն աշակերտներից թմրանյութ գնելու նպատակով։

Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 258-րդ հոդվածի 2-րդ մասի 2-րդ, 5-րդ, 8-րդ կետերով (շորթումը, որը կատարվել է մի խումբ անձանց կողմից նախնական համաձայնությամբ անօգնական վիճակում գտնվողի նկատմամբ, անչափահասի նկատմամբ): 4 անձի նկատմամբ հարուցվել է հանրային քրեական հետապնդում՝ Քրեական օրենսգրքի 258-րդ հոդվածի 2-րդ մասի 2-րդ, 5-րդ, 8-րդ կետերով: 2-ի նկատմամբ որպես խափանման միջոց կիրառվել է դաստիրակչական հսկողություն եւ վարչական հսկողություն, 1-ի նկատմամբ՝ տնային կալանք եւ բացակայելու արգելք։ Եվ մեկ անչափահաս անձի  վերաբերյալ կար ձերբակալման որոշում:

ՔԿ-ից «Փաստինֆո»-ի հետ զրույցում հայտնեցին, որ վերջինս հայտնաբերվել է։ Նրա նկատմամբ որպես խափանման միջոց է ընտրվել տնային կալանքը։ ՔԿ մամուլի քարտուղար Կիմա Ավդալյանը  մեզ հետ զրույցում նշեց, որ երկու տուժողից բացի՝ չորս  մեղադրյալներին ևս ուղարկել են տոքսիկաքիմական փորձաքննության, պարզելու՝ սպիտակ փոշենման զանգվածն ինչ բաղադրություն է ունեցել։

59
kotayk

Լրահոս