Նշենք, որ Շիրակի մարզի առաջին ատյանի ընդհանուր իրավասության դատարանի 2022 թվականի հունվարի 18-ի դատավճռով Սարգիս Ֆարմանյանը մեղավոր է ճանաչվել ՀՀ նախկին քրեական օրենսգրքի 38-104-րդ հոդվածի 2-րդ մասի 8-րդ կետով (շահադիտական դրդումներով սպանությանը դրդելը) և 38-266-րդ հոդվածի 1-ին մասով (թմրամիջոցներ իրացնելուն դրդելը) և դատապարտվել ազատազրկման՝ 16 տարի ժամկետով:
Փաստաբանի խոսքով՝ Սարգիս Ֆարմանյանը, դեռևս 2019 թվականի մարտի 2-ից գտնվելով քրեակատարողական հիմնարկում` խափանման միջոց կալանքի և հետո արդեն ազատազրկման ձևով պատիժը կրելու պայմաններում, ձեռք է բերել մի շարք հիվանդություններ և կախվածություններ, որոնք ժամանակի ընթացքում սրվել են:
Մասնավորապես. ՀՀ ԱՆ «Քրեակատարողական բժշկության կենտրոն» ՊՈԱԿ «Նուբարաշեն» ստորաբաժանման կողմից դեռևս 2024 թվականի սեպտեմբերին տրամադրված գրության համաձայն՝ դատապարտյալ Սարգիս Ֆարմանյանի մոտ առկա է «պարբերական հիվանդություն, խառը ձև, հաճախակի նոպաներով, հոգեկան և վարքային խանգարումներ՝ թմրամիջոցների օգտագործման հետևանքով, կախվածության համախտանիշ՝ փսիխոտիկ ներառումներով, գլխուղեղի եզակի գլիոզ օջախներ»:
Բացի այդ, Սարգիս Ֆարմանյանը կալանավայրում բազմիցս կատարել է ինքնավնասումներ, որոնք, ըստ իր հայտարարության, կատարվել են գիտակցությունը մթագնելու (հաճախ է մահացած մարդկանց մասին տեսիլքներ տեսնում) և ինքնատիրապետումը կորցնելու հետևանքով:
Ըստ փաստաբանի՝ իր վստահորդը քրեակատարողական հիմնարկում գտնվելու ընթացքում մի քանի անգամ տեղափոխվել է «Դատապարտյալների հիվանդանոց» և ՀՀ ԱՆ ՀԱՊԱԿ ՓԲԸ (Նուբարաշեն հոգեբուժարան), որտեղ ստացել է հոգեմետ դեղամիջոցներ։
Սամվել Պետրոսյանը նաև նշեց, որ դեռևս մեկ ամիս առաջ Սարգիս Ֆարմանյանի վերաբերյալ համապատասխան դատահոգեբուժական և դատահոգեբանական հանձնաժողովային փորձաքննություն իրականացնելու նպատակով գրություններ են ուղարկվել ՀՀ ԱՆ «Քրեակատարողական բժշկության կենտրոն» ՊՈԱԿ, ինչպես նաև Սարգիս Ֆարմանյանի և համապատասխան իրավասու աշխատակիցների կողմից կողմից ներկայացվել են հավաստիացումներ՝ դատապարտյալի՝ բժշկական պատշաճ ստուգումներ անցնելու անհրաժեշտության վերաբերյալ, սակայն մինչ օրս որևէ դրական պատասխան չի ստացվել:
Խնդրի առնչությամբ NEWS.am-ը գրավոր հարցմամբ դիմել է ԱՆ քրեակատարողական ծառայությանը, որտեղից հայտնել են, որ դատապարտյալի առողջական վիճակի վերաբերյալ տեղեկատվությունը համարվում է անձնական տվյալ, որը ենթակա է պաշտպանության:
Միևնույն ժամանակ, Քրեակատարողական ծառայության կենտրոնական մարմնի սոցիալական, հոգեբանական և իրավական աշխատանքների բաժնի պետ Ցողիկ Ալեքսանյանը, հղում կատարելով ՀՀ արդարադատության նախարարի 2023 թվականի հոկտեմբերի 25-ի «Արդարադատության նախարարության քրեակատարողական հիմնարկներում ինքնասպանության և ինքնավնասման ռիսկի զննության և գնահատման» N 631-Լ հրամանով հաստատված կարգին, հայտնել է, որ ազատությունից զրկված անձանց հետ իրականացվում են ինքնասպանության և ինքնավնասման ռիսկի զննություն և գնահատում, որի արդյունքներից ելնելով՝ անհրաժեշտության դեպքում բացվում է ինքնասպանության և ինքնավնասման ռիսկի կառավարման պլան, ձևավորվում բազմամասնագիտական խումբ:
«Բազմամասնագիտական խմբի կողմից ինքնասպանության և ինքնավնասման ռիսկի կառավարման պլան ունեցող, ազատությունից զրկված անձանց հետ իրականացվում են համապատասխան աշխատանքներ, այդ թվում նաև՝ հոգեբանական աջակցության և, անհրաժեշտության դեպքում, նաև հոգեբուժական միջամտության: Ազատությունից զրկված անձանց կողմից յուրաքանչյուր ինքնավնասման դեպքով կազմված փաստաթղթերն ուղարկվում են համապատասխան նախաքննական մարմին»,- ասված է կայքին ուղարկված պատասխանում:
