Վերադառնանք Երևանի քաղաքապետի ընտրություններին։ Իշխող «Քաղաքացիական պայմանագիր» կուսակցության քաղաքապետի թեկնածուն Տիգրան Ավինյանն է։ Նա տևական ժամանակ է զբաղեցնելով փոխքաղաքապետի պաշտոնը ստվերային քարոզարշավ է իրականացնում, տպավորություն ստեղծելով, որ ինչ անում է ժողովրդի համար է։ «Ապրելու երկիր» կուսակցությունը ևս հայտարարել է իր մասնակցության մասին։ Այս կուսակցության քաղաքապետի թեկնածուն Մանե Թանդիլյանն է։ Ի դեպ Թանդիլյանը եզակի պատգամավորների թեկնածուներից էր, որ 2017-ի ԱԺ ընտրություններում մեծամասնական ընտրակարգով առաջադրվելով հաղթանակ տարավ։
Ակնհայտ է, որ համադրելով այս ընթացքում Երևանի քաղաքապետի ընտրություններին մասնակցելու մասին պաշտոնապես հայտարարած ուժերին, կարելի է եզրակացնել, որ հիմնական ընտրապայքարը երկու ուժի միջև է լինելու՝ ՔՊ-ի ու «Ապրելու երկրի»։ Անգամ այս պարագայում էր «Քաղաքացիական պայմանագրի» շանսերը մեծ չեն։ «Ապրելու երկիրը» մեկ անգամ չէ, որ հաղթել է ՔՊ-ին, մի շարք համայնքներում իշխանությանը դարձնելով ընդդիմություն։
Օրեր առաջ հայտնի դարձավ, որ ՔՊ շտաբի պետը լինելու է արտակարգ իրավիճակների նախարար Արմեն Փամբուխչյանը:
Նախօրեին էլ հայտնի դարձավ, որ «Ապրելու երկիր» կուսակցության նախընտրական շտաբը ղեկավարելու է կուսակցության համահիմնադիր, քաղխորհրդի անդամ Մեսրոպ Առաքելյանը։ Վերջինս ընտրական փորձ ունի հատկապես ՔՊ-ի դեմ պայքարելու գործում:
Նա համակարգել է նաև ՏԻՄ ընտրություններում կուսակցության նախընտրական շտաբները։ Ավելին, նախորդ երկու տարվա ավագանու ընտրությունների արդյունքում այս կուսակցությունը ներկայացված է 18 համայնքում, համատեղ կառավարում է իրականացնում Տաթևում և հաղթել է Ալավերդի, Նոյեմբերյան համայնքներում՝ ընդդիմադիր դարձնելով ՔՊ-ին: Նույն սցենարը պատրաստվում են կիրառել նաև մայրաքաղաք Երևանում։
