Հայաստանի Հանրապետական կուսակցությունն ընտրություններին ընդառաջ դաշինքներ կազմելու հարց չի քննարկել: ՀՀԿ ԳՄ նիստի ավարտից հետո լրագրողների հետ հանդիպմանն այս մասին ասաց ՀՀԿ խոսնակ, ԱԺ փոխնախագահ Էդուարդ Շարմազանովը: «Կարծում եմ, որ Հանրապետականն ընտրություններին կմասնակցի իր ցուցակով: Հաշվի առնելով անցյալի փորձը մեր ցուցակում տեղ կգտնեն այն կուսակցությունների ներկայացուցիչները, որոնք մեզ հետ ճանապարհ են անցել և կցանկանան շարունակել անցնել այդ ճանապարհը»,- «Արմենպրես»-ի հաղորդմամբ նշեց Շարմազանովը:
Նա հիշեցրեց, որ ներկայում էլ Ազգային ժողովի ՀՀԿ խմբակցությունում ընդգրկված են տարբեր քաղաքական ուժերի ներկայացուցիչները, ովքեր սատարել են ՀՀԿ-ին և կուսակցության առաջնորդ Սերժ Սարգսյանին:
Շարմազանովն անդրադարձավ նաև ՀՀ Նախագահ Սերժ Սարգսյանի ԼՂՀ կատարած այցին ընդգծելով, որ հայկական զինված ուժերի մարտունակությունը շատ բարձր է, առաջնագծում ահռելի աշխատանք է կատարվել:
Շարմազանովի խոսքով ապրիլյան պատերազմից հետո անհրաժեշտ դասերն արդեն քաղվել են:
