Այսօր հուլիսի 27-ին, դանակով զինված ավազակային հարձակում է տեղի ունեցել Արմավիրի մարզում: Ժամը 18:30-ի սահմաններում դանակով զինված տղամարդը մտել է Էջմիածին քաղաքի Բաղրամյան 82 հասցեում գործող «Թոթլ կերային հավելումներ, համակցված կերեր, եկամտաբերության տեխնոլոգիաներ» խանութ և այնտեղից հափշտակել խոշոր չափի գումար:
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ոստիկանության Արմավիրի մարզային վարչությա պետ Կարեն Հակոբյանը, վարչության պետի տեղակալ Վահան Մաթևոսյանը:
Ժամանել են նաև ոստիկանության Վաղարշապատի բաժնի պետ Ռաֆայել Պողոսյանն ու բաժնի պետի օպերգծով տեղակալ Արթուր Ֆիշյանը:
Հաշվի առնելով հանցագործության վտանգավորության աստիճանը, ժամանել է նաև Էջմիածնի դատախազ Կարեն Խաչատրյանը:
Այս պահին դեպքի վայրի զննություն են կատարում Հայաստանի քննչական կոմիտեի Արմավիրի մարզային քննչական վարչության Վաղաշապատի քննչական բաժնի քննիչները հատկապես կարևոր գործերով ավագ քննիչ Վահե Սամսոնյանի և ավագ քննիչ Անի Մնացականյանի գլխավորությամբ:
Դեպքի վայր են ժամանել նաև ոստիկանության Արմավիրի մարզային վարչության պետ Սամվել Տոնոյանն ու ոստիկանության Էջնիածնի բաժնի պետ Դավիթ Բարոյանը: Տեղում ուժեղացված ծառայություն են կատարում ոստիկանության Էջմիածնի բաժնի համայնքային ոստիկանության ծառայողները բաժնի պետի ծառայության գծով տեղակալ Արմեն Կարապետյանի գլխավորությամբ:
Դեպքի վայրում հավաքվածներից մի քանի քաղաքացիներ, ովքեր հրաժարվեցին տեսախցիկի առաջ խոսել, ասում էին. «Մենակ էն տեսանք, որ մեծ թվով ոստիկաններ եկան, իսկ մինչ այդ էլ խանութի աշխատակցուհի Էսլենդային մարմնական վնասվածքներվ էջմիածնի հիվանդանոցի բժիշկների կողմից օպերատիվորեն տեղափոխեցին Էջմիածնի հիվանդանոց, որից հետո ոստիկաններն ու քննիչները տարածքը լենտերով փակեցին, բայց իմացանք, որ ներսում, երբ ճիվաղը հարձակվել է վաճառողուհու վրա, նա դիմադրություն է ցուցաբերել ու մարմնական վնասվածքներ է ստացել»:
Ֆոտոլրագրողը հայտնում է, որ ներսում ոստիկաններն ու քննիչները հայտնաբերել են արնանման հետքեր, գետնին թափված դրամներ մեծ մասը արյունոտ, կոտրված դանակի շեղբ: Հանցագործն այնուամենայնիվ կարողացել է հափշտակել խոշոր չափի գումար: Ըստ նախնական տեղեկությունների այն կազմում է 2-3 մլն դրամ:
Փաստի առթիվ Վաղարշապատի քննչական բաժնում հարուցվել է քրեական գործ ավազակային հարձակում կատարելու հատկանիշներով:
Մինչ դեպքի վայրում քննիչների հետ աշխատում էին ոստիկանության Արմավիրի մարզային վարչության ոստիկանները, Վաղաշապատի ոստիկանապետ Ռ. Պողոսյանն ու բաժնի պետի օպերգծով տեղակալ Ա. Ֆիշյանը կարծես օպերատիվ տեղեկություններ է ստացել ենթադրյալ կասկածյալի մասին ու մեկնել են ստահակի բնակության վայր:
Ֆոտոլրագրողի տեղեկություններով Էջմիածնի հիվանդանոց տեղափոխված կինն այնուհետ տեղափոխվել է Երևանի «Աստղիկ» բժշկական կենտրոն:
Տեղում ուժեղացված ծառայություն են կատարում նաև ճանապարհային ոստիկանության 2-րդ սպայական գումարտակի 1-ին վաշտի ավագ տեսուչներ Արտակ Ասատրյանն ու Գառնիկ Մելքոնյանը, որպեսզի հետաքրքրասեր վարորդներն իրենց ավտոմեքենաները չկայանեն նշված վայրում, որ ոստիկանության Արմավիրի մարզային վարչության փորձաքրեագիտական խմբի ավագ փորձաքրեագետներ Արայիկ Նավասարդյանն ու Արմեն Ղարիբյանը կարողանան անհրաժեշտ գործողություններ կատարեն:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
