Բարձրագույն դատական խորհրդի անդամներ Արթուր Աթաբեկյանն ու Էդգար Հովհաննիսյանը համատեղ հայտարարություն են տարածել «168.am»-ի 16.12.2023թ.-ի կեղծ տեղեկություններ տարածող հոդվածի վերաբերյալ:
«ՀԵՐՔՈՒՄ. Էդգար Հովհաննիսյանն ու Արթուր Աթաբեկյանը կողմ չեն քվեարկել դատավոր Տիգրան Փոլադյանի վերաբերյալ միջնորդություններին
«168 ժամ» լրատվականը հանդես է եկել «Դատավոր Տիգրան Փոլադյանի նկատմամբ քրեական հետապնդում սկսելու օգտին քվեարկել են նաև նրա երկու ընկերները» վերտառությամբ հրապարակմամբ և նյութում կատարել մի շարք պնդումներ, որոնք չեն համապատասխանում իրականությանը:
Մասնավորապես նշվում է, թե Բարձրագույն դատական խորհրդի երկու անդամներ Էդգար Հովհաննիսյանը և Արթուր Աթաբեկյանը մասնակցել են Սնանկության դատարանի դատավոր Տիգրան Փոլադյանին վերջինիս լիազորությունների իրականացման կապակցությամբ հանրային քրեական հետապնդում հարուցելուն համաձայնություն տալու և նրան ազատությունից զրկելու վերաբերյալ ՀՀ Գլխավոր դատախազի կողմից ներկայացված միջնորդությունների քննարկմանը, ավելին, լրատվամիջոցի պնդմամբ, նրանք կողմ են քվեարկել այս միջնորդություններին:
Հարկ ենք համարում պարզաբանել, որ, թե՛ Էդգար Հովհաննիսյանը, թե՛ Արթուր Աթաբեկյանը նշված միջնորդություններին կողմ չեն քվեարկել, ավելին ԲԴԽ անդամ Արթուր Աթաբեկյանը գտնվել է արձակուրդում և չի մասնացկել այս գործով որևէ նիստի, իսկ ԲԴԽ անդամ Էդգար Հովհաննիսյանը նիստի ընթացքում ինքնաբացարկ է հայտնել և կրկին գործի քննությանը չի մասնակցել:
Հորդորում ենք լրատվամիջոցին շտկել նյութում առկա սխալ պնդումները և զերծ մնալ հանրությանը շփոթեցնող, չճշտված տեղեկություններ տարածելուց:
Արթուր Աթաբեկյան, սնանկության դատարանի դատավոր, ԲԴԽ անդամ,
Էդգար Հովհաննիսյան, Արմավիրի առաջին ատյանի դատարանի դատավոր, ԲԴԽ անդամ»։
Shabat.am
