««Բարձունք»-ը, հանդիսանալով կրթական շարժում, այնուամենայնիվ՝ չի կարող և չի ուզում զերծ մնալ մեր հայրենիքին ու հայրենակիցներին առնչվող կարևոր իրողությունների վերաբերյալ հստակ դիրքորոշում հայտնելուց։ Միևնույն ժամանակ «Բարձունք» համայնքի անդամները իրավունք ունեն ազատորեն արտահայտել իրենց կարծիքն ու մասնակցնել այն գործընթացներին, որոնք կհամարեն նպատակային։
«Բարձունք»-ը դեմ չէ սահմանագծման և սահմանազատման ԻՐԱԿԱՆ գործընթացին, սակայն, այս պահին գործ ունենք ոչ թե սահմանազատման, այլ միակողմանի զիջումների հետ։ Մենք՝ «Բարձունք» համայնքի անդամներս, դեմ ենք միակողմանի զիջումներին։ Կառավարության պնդումների ու հայտարարությունների համաձայն՝ Հայաստանը այդ զիջումներին ի պատասխան ստանում է ինչ-որ ռիսկերի նվազեցում, որոնք, վստահաբար, անհիմն հավաստիացումներ են և որևէ արժեք չունեն, քանի որ հիմնված չեն երկկողմանի փոխվստահության, փոխզիջումների և սահմանազատման փաթեթային գործընթացի վրա։ Միակողմանի զիջումները վկայում են այն մասին, որ Ադրբեջանը հակված չէ կառուցողական քաղաքաքանություն վարել և հասնդես է գալիս միայն պահանջատիրական դիրքից, ինչը ոչ մի պարագայում չի հանգեցնելու փոխվստահության ձևավորմանը։ Հակառակը, միակողմանի զիջումները ավելի են սրելու իրավիճակը՝ այդ թվում պատերազմական իրավիճակների սրման տեսանկյունից։
Հարկ ենք համարում նշել նաև, որ սահմանազատման և սահմանագծման գործընթացում առաջ են գալիս տվյալ տարածքների բնակիչների իրավունքների (կյանքի, ազատ տեղաշարժի, սեփականության և այլ) և անվտանգության լուրջ խնդիրներ, որոնք պետք է լուծվեն միջազգային իրավունքի և փոխզիջումների շրջանակում և ոչ միակողմանի զիջումների տրամաբանությամբ։
Սահմանազատման գործընթացում շատ կարևոր իրողություն են Հայաստանի կենսական նշանակության հարցերը (լոգիստիկ ուղիներ, ջրեր, էներգետիկ և այլ ենթակառուցվածքներ և այլն)։ Ճանապարհային խնդիրներին զուգահեռ առաջ է գալիս նաև Հայաստան մտնող հիմնական գազատարի անվտանգության խնդիրը, ինչը կարող է հավելյալ լծակ դառնալ Հայաստանի վրա ճնշումներ գործադրելու առանց այդ էլ մեծ գործիքակազմի ցանկում։
Հաշվի առնելով Սյունիքի փորձը՝ պաշտպանական գծի բացակայության պարագայում Ադրբեջանական զորքերի քայլելով առաջ գալը և իրենց հարմար դիրքերը զբաղեցնելը, Տավուշի պաշտպանական գիծը քանդելն ու ականազերծումն ու առկա դիրքերի ետբերումը համարում ենք արկածախնդրություն։
Անհրաժեշտ ենք համարում, որ Կառավարությունը դադարեցնի միակողմանի զիջումների քաղաքականությունը և բոլոր միջոցները ներդնի երկկողմանի փոխվստահության մթնոլորտի ձևավորման կազմակերպման քաղաքական մեխանիզմների մշակման գործում։ Սահմանազատումը պետք է իրականացվի ոչ թե լեգիտիմությունից զուրկ «Ալմա Աթա»-յի հռչակագրի, այլ միջազգային իրավունքի և նորմերի հիման վրա, որտեղ առաջնայինը մարդու իրավունքներն են։
Հայտնում ենք, որ մենք նաև այն շարժումների կողքին ենք, ովքեր դուրս են եկել փողոց՝ քաղաքական պայքարի («Տավուշը հանուն հայրենիքի», «Մարտական եղբայրություն», «Բռունցքդ բե՛ր»)։ Իրավապահ մարմինների ընթացիկ գործողությունները արդեն իսկ վերածվում են քաղաքական ճնշումների, ինչը անթույլատրելի է։ Հույս ունենք, որ իրավապահ համակարգը չի հատի իր լիազորությունների սահմանը և կարգուկանոնի պահպանման գործը կիրականացնի հավուր պատշաճի։
Կոչ ենք անում մտահոգ քաղաքական շարժումներին մեկտեղել իրենց ներուժը և ձևավորել ընդհանրական քաղաքական օրակարգ և առավել մեծ ներուժ ունեցող քաղաքական շարժում»,- ասված է հայտարարության մեջ։
