2019 թվականին Արգիշտի Քյարամյանը զբաղեցնում էր պետական վերահսկողության ծառայության պետի ղեկավարի պաշտոնը, ապա մեկ օրով նշանակվեց Քննչական կոմիտեի նախագահի 5-րդ տեղակալ, ստացավ գնդապետի կոչում և նույն օրը նշանակվեց Ազգային Անվտանգության ծառայության տնօրենի տեղակալ, իսկ 2020-ի հունիսի 8-ին՝ ԱԱԾ տնօրեն, սակայն 4 ամիս անց՝ հոկտեմբերի 8-ին, ազատվեց այդ պաշտոնից։
Tert.am-ը ուսումնասիրել է Արգիշտի Քյարամյանի՝ ՀՀ ազգային անվտանգության տնօրենի պարտականությունները դադարեցնելու հայտարարագիրը:
Արգիշտի Քյարամյանը հայտարարագրել է 2 անհատական բնակելի տուն՝ Երևանի Քանաքեռ-Զեյթուն վարչական շրջանում և Գեղարքունիքի մարզի Երանոս համայնքում: Երկուսն էլ ԱԱԾ նախկին տնօրենը որպես նվիրատվություն է ստացել 2016 թ.: Նրա հայտարարագրում ներկայացված է նաև 1 բնակարան՝ Քանաքեռ-Զեյթուն վարչական շրջանում, որն էլ 2010 թ. ժառանգություն է ստացել:
ՔԿ նախագահի տեղակալը հայտարարագրել է 4 հողամաս, որոնց 3-ը գտնվում են Երանոս համայնքում, 1-ը՝ Ծաղկաձորում: 4 հողամասերը ևս Արգիշտի Քյարամյանը նվիրատվություն է ստացել 2016 թ.: Հայտարարագրում առկա է նաև հողին ամրակայված այլ անշարժ գույք՝ Ջրվեժում, ինչպես նաև ավտոտնակ՝ Արաբկիր վարչական շրջանում: Հողին ամրակայված անշարժ գույքը կրկին ներկայացված է նվիրատվություն, նորից 2016 թ.-ին, իսկ ավտոտնակը նա գնել է 2011 թ.:
Ընդհանուր առմամբ, Արգիշտի Քյարամյանը 9 անշարժ գույք, որից 7-ը նվիրատվություն է ստացել, 1՝ ժառանգությունը, 1-ը գնել է:
ՔԿ նախագահի տեղակալը 2017 թ. գնել է 2014 թ. արտադրության Mercedes-Benz ավտոմեքենա:
Նա ունի 6000 ԱՄՆ դոլար հանձնած փոխառություն՝ ավանդ: Իսկ կանխիկ դրամական միջոցները կազմում են 35 մլն դրամ և 48 հազար դոլար:
Արգիշտի Քյարամյանը ԱԱԾ տնօրենի պաշտոնում 4 ամիս աշխատելու ընթացքում ստացել է 7 մլն 952 հազար դրամ աշխատավարձ:
