Ադրբեջանի պարալիմպիկ թիմի անդամ, Տոկիո-2020-ի ոսկե մեդալակիր ձյուդոիստուհի Շահանա Հաջիևան ցմահ որակազրկվել է։ Միջազգային բժշկական հանձնաժողովը հաստատել է, որ 24-ամյա մարզուհին չունի տեսողության սահմանափակումներ, ինչն անհամատեղելի է պարաձյուդոյի թույլ տեսողություն ունեցողների մրցաշարերին (J2 կարգ, -52 կգ) մասնակցելու հետ։
Ադրբեջանի Պարալիմպիկ կոմիտեն պարզաբանել է, որ Տոկիոյի B1, B2 և B3 կարգերը վերանայվել են Փարիզ-2024-ի նախաշեմին և միավորվել J1 ու J2 կարգերի մեջ։ Արդյունքում՝ մի շարք աչքի հիվանդություններ հանվել են թույլատրելի ցանկից, ինչը խստացրել է մրցումների նորմերը։
