Իրանը կարևորում է «3+3» ձևաչափով համագործակցությունը։ Այդ մասին Ժնևում Ադրբեջանի խորհրդարանի խոսնակ Սահիբա Գաֆարովայի հետ հանդիպման ժամանակ ասել է Իրանի խորհրդարանի նախագահ Մոհամմեդ-Բաղեր Ղալիբաֆը:
Նրա խոսքով՝ Իրանը շահագրգռված է Ադրբեջանի հետ հարաբերությունների հետագա ամրապնդմամբ․ «Պետք է լայնորեն օգտագործել տնտեսական համագործակցության հնարավորությունները, այդ թվում՝ տրանսպորտային, տարածաշրջանային հաղորդակցությունները»,- նշել է Իրանի խորհրդարանի նախագահը։
Ադրբեջանի խորհրդարանի խոսնակն էլ իր հերթին նշել է, որ Ադրբեջանի և Իրանի միջև տարբեր ուղղություններով զարգանում են համագործակցության հարաբերությունները: Նա կարևորել է երկկողմ ձևաչափով ձեռք բերված համաձայնությունները, համատեղ իրականացվող ծրագրերը՝ համագործակցության հետագա ընդլայնման տեսանկյունից: Ադրբեջանական կողմը նշել է, թե, իբր, «մեծ նշանակություն է տալիս տարածաշրջանում խաղաղության և անվտանգության ապահովմանը, համագործակցությանը»:
Հանդիպմանը քննարկվել են նաև այս տարվա նոյեմբերին Բաքվում COP29-ի շրջանակում կայանալիք խորհրդարանական համաժողովի հետ կապված հարցերը:
