«Հայաստանի գույներ» ջրաներկի միջազգային երկրորդ փառատոնի շրջանակներում սեպտեմբերի 28-ին Գյումրու համայնքային ցուցասրահում բացվեց Մարտիրոս Սարյանի ջրաներկ գործերի բացառիկ ցուցահանդեսը։ Ինչպես տեղեկացնում է «Արմենպրես»-ը, ցուցադրության շրջանակներում ավելի քան մեկ ամիս կցուցադրվեն Մարտիրոս Սարյանի տուն-թանգարանից եւ Հայաստանի Ազգային պատկերասրահից Գյումրի բերված շուրջ երեք տասնյակ ջրաներկ աշխատանքներ։
Ցուցահանդեսի բացմանը ներկա էին Մարտիրոս Սարյանի, Ավետիք Իսահակյանի և Մինաս Ավետիսյանի ժառանգները։
«Սա աննախադեպ մշակութային իրադարձություն է։ Շնորհակալ ենք բոլոր կազմակերպիչներին։ Վստահ ենք, որ այս հարկի տակ հազարավոր գյումրեցիներ և Գյումրի այցելած զբոսաշրջիկներ առիթ են ունենալու վայելելու Մարտիրոս Սարյանի ջրաներկ աշխատանքները»,-ողջունելով ցուցահանդեսի մասնակիցներին՝ նշեց Գյումրու համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը։
«Մարտիրոս Սարյանը եղել է Գյումրու պատվավոր քաղաքացի, և ինձ համար մեծ պատիվ է այսօր ներկա լինել այս ցուցահանդեսի բացմանը։ Ուրախ եմ, որ գյումրեցիները հնարավորություն կունենան տեսնելու Սարյանի ջրաներկ աշխատանքները, նկարազարդումները»,-նշեց Մարտիրոս Սարյանի տուն-թանգարանի տնօրեն Բելլա Իսահակյանը։
Վերջին անգամ Սարյանի գործերը Գյումրիում ցուցադրվել էին խորհրդային տարիներին։ Ցուցահանդեսին ներկայացված են Սարյանի տարբեր տարիների գործերը։
Սեպտեմբերի 28-29-ը «Հայաստանի գույներ» ջրաներկի միջազգային փառատոնը Գյումրի է բերել ջրաներկի աշխարհահռչակ 14 վարպետների 13 երկրից։ Փառատոնի կազմակերպիչը՝ «Արվեստա» ընկերությունն է։ Փառատոնն իրականացվում է ՀՀ կրթության, գիտության, մշակույթի և սպորտի նախարարության, Գյումրու համայնքապետարանի և Հայաստանի նկարիչների միության աջակցությամբ։