Հայաստանի փոխչեմպիոն և գավաթակիր «Նոան» արձագանքել է Հայաստանի ֆուտբոլի ֆեդերացիայի նախագահ Արմեն Մելիքբեկյանի աղմկահարույց հայտարարությանը, ըստ որի՝ նա այս պահին մտադրություն չունի կրկին առաջադրվել ՀՖՖ նախագահի պաշտոնում։
ՀՖՖ գործող նախագահն իր այս որոշման մասին բարձրաձայնել է Արմեն Գարամյանի YouTube-յան «Podcast with Garamyan» հաղորդաշարին տված հարցազրույցում։
«Այսօր հարցազրույցի ընթացքում Արմեն Մելիքբեկյանը հայտարարեց, որ չի առաջադրվելու ՀՖՖ նախագահի հաջորդ ընտրություններում։ Մենք այս հայտարարությունը գնահատում ենք որպես դրական և կարևոր զարգացում հայկական ֆուտբոլի համար։ Միևնույն ժամանակ՝ արձանագրում ենք, որ նման հայտարարությունից հետո որևէ հետքայլ կամ դիրքորոշման փոփոխություն չի կարող ընդունելի լինել հայկական ֆուտբոլային հանրության համար։ Մենք ակնկալում ենք, որ առաջիկա փուլը կբերի նոր մոտեցումներ, նոր արժեքներ և իրական բարեփոխումներ, որոնք անհրաժեշտ են հայկական ֆուտբոլը զարգացման նոր մակարդակ տեղափոխելու համար»,- նշված է «Նոայի» հայտարարությունում։
Հիշեցնենք, որ Մելիքբեկյանն այս պաշտոնում վերընտրվել էր 2023 թվականին՝ քվեարկության արդյունքում առաջ անցնելով Հայաստանի ազգային հավաքականի նախկին ֆուտբոլիստ Արաս Օզբիլիսից։
Armsport
