«Ազգային ժողովի նախկին պատգամավոր, ՀՀԿ-ական Տիգրան Արզաքանցյանին պատկանող 3 ձեռնարակությունների՝ «Գրեյթ Վելլի ՀՁ»-ի , «Գրեյթ Վելլի Քամփընի»-ի , «Աշտարակյան գինիներ»-ի գույքը հանվել է աճուրդի։
Անցյալ տարի՝ դեկտեմբերի 27 –ին ՝«Գրեյթ Վելլի» ՀՁ-ի աճուրդ է տեղի ունեցել, այն կայացել է մասամբ՝ վաճառվել է մեկ լոտ։
Այս մասին տեղեկացրեց «Գրեյթ Վելլի» ՀՁ-ի սնանկացման գործով կառավարիչ Արսեն Չիտչյանը։
«Սնանկացման գործընթացը ավարտված չէ,ինչ վերաբերում է գույքի վաճառքին, ապա բաց աճուրդ է նախատեսված»,-ընդգծեց նա։
Արսեն Չիտչյանը հորդորեց մանրամասների մասին տեղեկանալ պաշտոնական հայտարարությունների azdarar.am կայքից։ Նա նաև չմանրամասնեց, թե ընկերությունը կոնկրետ որքա՞ն պարտք ունի։ Նշված կայքից տեղեկանում ենք,որ 20.01.2017թ. ժամը 13:00-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի շենքում տեղի կունենա «Գրեյթ վելլի ՀՁ» ՍՊԸ-ին սեփականության իրավունքով պատկանող գույքի բաց դասական եղանակով աճուրդ, որում 9 լոտ վաճառք է լինելու։
Աճուրդին լինելու է ավտոմեքենաներ ՝ՎԱԶ, ԳԱԶ, ՄԱԶ, BMW մակնիշի, ինչպես նաև գրասենյակային գույք, մաքրման ֆիլտր, կոնյակի սպիրտ։ (մեկնարկային գները նշված են կայքում):
Հիշեցնենք,որ մամուլի հրապարակումների համաձայն՝ «Գրեյթ Վելլիի» կուտակած աշխատավարձերի պարտքն ավելի քան 80 մլն դրամ է: Ընկերությունն ավելի քան 2 մլն դոլար էլ պարտք է «Արդշինբանկ» ՓԲԸ-ին, մոտ 286 հազար դոլար՝ «ՎՏԲ-Հայաստան բանկ» ՓԲԸ-ին, ևս 756.5 եվրո՝ «ՎՏԲ-Հայաստան բանկ» ՓԲԸ-ին: «Գրեյթ Վելլի ՀՁ»-ն նաև ավելի քան 155 մլն դրամ է պարտք Պետական եկամուտների կոմիտեին, 53 մլն 302 հազար դրամ՝ «Արտաշատի գինու-կոնյակի գործարան» ՓԲԸ-ին, 82 մլն 250 հազար դրամ։ Ընդ որում՝ պարտքեր ցուցակը այսքանով չի սահմանափակվում։ Ընկերությունների մի շարք աշխատակիցների ևս պարտք է, թե կոնկրետ որքան՝ չի հրապարակվում։
Tert.am