Ըստ աղբյուրի՝ դեպքի վայր են ժամանել ոստիկանության Արարատի մարզային վարչության պետ Սարիբեկ Ռուստամյանը և ոստիկանության Մասիսի բաժնի պետ Վահագն Գրիգորյանը։
Տեղում պարզվել է, որ անհայտ անձը Մասիս քաղաքի Հանրապետության և Հերացի փողոցների խաչմերուկում կայանված BMW X5 մակնիշի ավտոմեքենայի ձախ կողմի հետևի դուռը բացել է և այնտեղից հափշտակել մոտ 650 գրամ քաշով ոսկյա զարդեր։
Փաստի առթիվ ոստիկանության Մասիսի բաժնում հարուցվել է քրեական գործ՝ ՀՀ քր.օր-ի 176 հոդվածի 3-րդ մասի 1-ին կետի հատկանիշներով։
Մինչ ոսկու սեփականատերը, որը ոսկերչական խանութի տեր է, փորձում էր, ժողովրդի լեզվով ասած՝ «իր կանալներով գտնել» գողին կամ գողերին, ոստիկանության Արարատի մարզային վարչության պետ Ս. Ռուստամյանի որոշմամբ ստեղծվում է օպերատիվ խումբ, որում ներգրավվում են ոստիկանության Արարատի մարզային վարչության քրեական հետախուզության և ոստիկանության Մասիսի բաժնի քրեական հետախուզության բաժանմունքի օպերլիազորները։
Մարզի ոստիկանապետի հրամանով որոշվում է իրականացնել «Կողոպտիչը չպետք է հասցնի դառնալ ոսկե երիտասարդ» օպերացիան։ Տաք հետքերով ոստիկանները, ձեռնարկելով անհրաժեշտ օպերատիվ հետախուզական և հսկայածավալ միջոցառումներ, կողոպուտ կատարելու կասկածանքով Մասիսի ոստիկանություն են բերման ենթարկում Արարատի մարզի բնակիչ՝ 25-ամյա Գեդամ Մ-ին։ Վերջինս լինում է Opel Astra մակնիշի ավտոմեքենայով։
Փաստերի ճնշման տակ Գեղամ Մ.-ն խոստովանում է, որ նշված ավտոմեքենայով ինքը գնացել է Մասիս քաղաքի «Մորենա» ռեստորանային համալիրի մոտ, մեքենան կայանել ռեստորանի հետնամասում, ապա BMW X5-ի դուռը բացելու միջոցով այնտեղից հափշտակել է ոսկյա զարդերը։ Ֆոտոլրագրողի տեղեկություններով՝ հափշտակվածը գնահատվել է մոտ 12 մլն 500 հազար դրամ։
Գեղամ Մ.-ի տնից հայտնաբերվել են ոսկյա զարդերը, նա ձերբակալվել է։