Politik.am-ը գրում է.
«Օրերս Yerevan.today լրատվականը գրել էր, որ Նիկոլ Փաշինյանի կինը Աննա Հակոբյանը կրում է 18 կարատանոց ոսկուց, Roger Dubuis ֆիրմայի ժամացույց, որի արժեքը կայքում նշված է 31 900 ԱՄՆ դոլար:
Աննա Հակոբյանը ճոխությունների միակ սիրահարը չէ այս իշխանության մեջ։ Վերջին տարիներին մամուլը տասնյակ հրապարակումներ է արել ՔՊ-ականների կողմից նոր գնված թանկարժեք մեքենաների, տների, առանձնատների և բիզնեսների մասին։ Իշխանության գալուց հետո, ժամանակին պարտքով գարեջուր խմողները, միայն ամենաթանկարժեք հանգստավայրերում են հանգստանում։ ՔՊ-ականների ցոփ ու շվայտ կյանքին չի խանգարում անգամ աղետալի պարտությունն ու ծանր վիճակում հայտնված սահմանամերձ բնակավայրերի բնակիչների հոգսերը։
Նկատենք, որ հիմա շռայլությունների մեջ խեղդվող իշխանականները ժամանակին փող էին հավաքում, որ «սովից չսատկեն»։ Սա մեր գնահատականը չէ, այլ 2018 թվականին իրենց վիճակը նկարագրող իշխանական պատգամավոր Հովիկ Աղազարյանին է․ «Նստել էինք մեր վարչությունով և կոպեկներս էինք հաշվում, թե ով կարա 10 հազար դնի, 20 հազար դնի, որ հաց-պանիր առնենք, մի երկու վրան, որ չմրսենք սատկենք հասնենք, տեսնենք ինչ ենք անում։ Հաշվարկեցինք, որ մեր գումարները հերիքում է 5 օրվա համար։ Չորրորդ օրվանից մենք սկսեցինք բանան ուտել»,-2018 թվականին հայտարարում էր Հովիկ Աղազարյանը, երբ խոսում էր իրենց թիմի մասին։
Ահա թե ինչ նկատի ունի Նիկոլ Փաշինյանը, երբ հայտարարում է, որ աղքատությունը նվազել է Հայաստանում։ Իրենք այլևս աղքատ չեն և չեն մտահոգվում սովից մեռնելու վտանգի մասին և իրենց թվում է, թե իրենց նախկին «գործընկերները» մյուս աղքատները ևս նման խնդիր չունեն»։
