Մայիսի 9-ին՝ Հաղթանակի և Խաղաղության օրը.Նաիրի խոշորացված համայնքում

Համայնքի ղեկավար Նորայր Սարգսյանը Պռոշյան, Քասախ, Զովունի, Եղվարդ բնակավայրերում, իսկ համայնքի ղեկավարի առաջին տեղակալ Կարեն Հարությունյանը Զորավան, Արագյուղ, Սարալանջ և Բուժական բնակավայրերում Նաիրիի համայնքապետարանի աշխատակազմի, համայնքի ավագանու անդամների, Նաիրի համայնքի վարչական շրջանների ղեկավարների, ՀՈԱԿ-ների աշխատակիցների, համայնքի դպրոցների ուսուցիչների, աշակերտների, բնակիչների հետ այցելեցին Հայրենական մեծ պատերազմում և Արցախյան գոյամարտում զոհված հերոսների հիշատակը հավերժացնող հուշակոթողներ։

Զովունիում մարդաշատ էր Հայրենական մեծ պատերազմում զոհվածների հիշատակին նվիրված հուշարձան-համալիրը, որի տարածքն այս տարի բարեկարգվել, կանաչապատվել է։

Ճարտարապետ Հ․ Ասլանյանի և քանդակագործ Հ․ Իսահակյանի 1985 թվականին կառուցած այս ինքնատիպ հուշակոթողն այսօր նոր տեսք ու շունչ էր ստացել։ Հուշարձանի տարածքում բացվել է թանգարան, որտեղ տեղադրված են Զովունիից Հայրենական մեծ պատերազմի, Արցախյան գոյամարտի և 44-օրյա պատերազմի մասնակիցների մասին պատմող վահանակներ, ցուցադրված են անձնական իրեր։

Ներկաներին գրական-երաժշտական ելույթով ողջունեցին Զովունիի մշակույթի տան և երաժշտական դպրոցի սաները։

Ողջույնի խոսք ասացին Նաիրի համայնքի ղեկավար Նորայր Սարգսյանը և Զովունի բնակավայրի վարչական ղեկավար Արտաշես Ղարիբյանը։ Հուշակոթողի բացման արարողությանը ներկա էր նաև Եզդիների միության նախագահ Խդր Հաջոյանը։

Բացման ժապավենը կտրեցին 44-օրյա պատերազմում զոհված Արամայիս Հայրապետյանի հայրը՝ Սուրեն Հայրապետյանը և Աշոտ Մաթևոսյանի որդին՝ Հենրի Մաթևոսյանը։

Համայնքի ղեկավարը, միջոցառման մանակիցները, բնակիչները ծաղիկներ խոնարհեցին, խնկարկեցին ու լռությամբ հարգեցին հայրենիքի համար իրենց կյանքը նվիրաբերած քաջ հայորդիների վառ հիշատակը։

Եղվարդ քաղաքում բարեկարգվել է ճարտարապետ Գևորգ Դանիելյանի նախագծով 1978 թվականին կառուցված հուշարձան-համալիրի տարածքը, դարձել առավել կանաչապատ, վերանորոգվել, նոր տեսք է ստացել ճեմուղին։ Կառուցվել է Արցախյան ազատամարտի զոհերի հիշատակին նվիրված հուշապատ, տեղադրվել է խաչքար։

Հաղթանակի օրվան նվիրված միջոցառումը սկսվեց համայնքի ղեկավարի,համայնքապետարանի աշխատակազմի, հիմնարկ ձեռնարկությունների, կազմակերպությունների ներկայացուցիչների, բնակիչների կողմից անմար կրակի շուրջը ծաղիկների, ծաղկեպսակների խոնարհումով։

Խաչքարի օծում և հոգեհանգստյան կարգ կատարվեց Կոտայքի թեմի առաջնորդ բարձրաշնորհ Տեր Առաքել արքեպիսկոպոս Քարամյանի ձեռամբ, ուղեկցությամբ Եղվարդի Սուրբ Սարգիս եկեղեցու հոգևոր սպասավոր Տեր Աբել քահանա Ստեփանյանի։

Հաջորդեց գրական-երաժշտական միջոցառում։ Ասմունքով, երաժշտական կատարումներով հանդես եկան Եղվարդի շնորհալի երիտասարդները։

Ծաղիկներ խոնարհվեցին նաև Եղվարդի Սուրբ Սարգիս եկեղեցու բակում տեղադրված խաչքարին՝ նվիրված 44-օրյա պատերազմում զոհվածների հիշատակին։