«Հրապարակ» թերթը գրում է.
««Քաղաքացիական պայմանագիր» կուսակցության նախաձեռնող խմբի նախօրեի նիստում, մեր տեղեկություններով, խմբակցության պատգամավոր Հովիկ Աղազարյանն ունիկալ առաջարկով է հանդես եկել։
Իսկ ի՞նչ է առաջարկել ամենակրեատիվ ՔՊ-ականը` Հովիկ Աղազարյանը. երբ ֆինանսների նախարարը հասկացրել է, որ բյուջեում փող չկա, պետք է հարկային ռազմավարությունը փոխել, հարկեր-տուրքերի մասով նոր մոտեցումներ որդեգրել, ԱԺ տնտեսական հանձնաժողովի փոխնախագահ Հովիկ Աղազարյանը՝ ոչ ավել, ոչ պակաս, առաջարկել է ՀԴՄ կտրոն չվերցնող քաղաքացիներին տուգանել, եթե պետք է, նաեւ՝ դատել։
Հայտնի է, որ 2018 թվականից այս իշխանությունը՝ Նիկոլ Փաշինյանի գլխավորությամբ, խոսում է ՀԴՄ կտրոն պահանջելու անհրաժեշտության մասին, ՀԴՄ-ի նկատմամբ սեւեռումն այն աստիճանի է հասել, որ ամիսներ առաջ Նիկոլ Փաշինյանն «ազգային հերոս» հռչակեց հարկ վճարողներին։ Աղազարյանն էլ, թերեւս, փորձելով հարցին մյուս ծայրից մոտենալ, որ եթե հարկ վճարողները հերոս են, ապա այդ փաստի վրա աչք փակողներին էլ պետք է հանցագործ համարել, առաջարկել է տուգանել բոլոր այն քաղաքացիներին, ովքեր ՀԴՄ կտրոն չեն վերցնի։ Թե ինչպես է այդ գործընթացը վերահսկվելու, Աղազարյանը չի մանրամասնել․ հավանաբար, մի քանի հարյուր պարեկի էլ հերթապահության կդնեն առեւտրի եւ սպասարկման կենտրոնների մոտ, որպեսզի հենց քաղաքացին դուրս գա այդտեղից, արագ պահանջեն ցույց տալ՝ արդյոք ՀԴՄ կտրոն վերցրե՞լ է, թե՞ ոչ, եթե չի վերցրել, ապա տեղում արձանագրություն կազմեն եւ տուգանեն «տուգանքի մատերիալ չհանդիսացող» ՀՀ քաղաքացիներին։
Մեր աղբյուրի պատմելով՝ այս առաջարկը ՔՊ-ականների հավանությանը չի արժանացել: Ֆինանսների նախարար Վահե Հովհաննիսյանն Աղազարյանին փորձել է համոզել, որ ավելի արդյունավետ կլինի, եթե ՀԴՄ կտրոն վերցնող քաղաքացիներին դրամական պարգեւ տան։ Օրինակ, կարող են ամսական կտրվածքով քաղաքացիներից պահանջել, որ ցույց տան, թե որքան գումարի ՀԴՄ կտրոն են հավաքել, եւ ընդհանուր գումարի որոշակի տոկոսի չափով պարգեւատրեն բարեխիղճ եւ պետության մասին հոգ տանող քաղաքացիներին։
Սակայն Աղազարյանն անդրդվելի է մնացել՝ մոտավորապես հասկացնելով, որ հայերը գործում են, երբ հարվածում են նրանց գրպանին։
Մանրամասները` թերթի այսօրվա համարում
