Ինչպես հայտնում է ֆոտոլրագրող Գագիկ Շամշյանը, առավոտյան ժամը 09:20-ից մինչև 17:30-ն ընկած ժամանակահատվածում Երևան-Գյումրի ավտոճանապարհի 82 կմ հատվածից մինչև 86 կմ հատված շղթայական ավտովթարներ են տեղի ունեցել, ինչի հետևանքով էլ առաջացել էին խցանումներ, իսկ վթարների պատճառը եղել է մառախուղը, մերկասառույցը, որոշ վարորդների կողմից ավտոմեքենաները ոչ ձմեռային անվադողերով վարելը:
Օպերատիվ են գործել ՀՀ Ներքին գործերի նախարարության Փրկարար ծառայության Թալինի հրշեջ-փրկարարական ջոկատի փրկարարները և ՊԾ Արագածոտնի մարզի գումարտակի պարեկներն ու համայնքային ոստիկանության Թալինի բաժնի ոստիկանները:
Բոլոր վթարների փաստով ՊԾ Արագածոտնի մարզի գումարտակում փաստաթղթեր են ձևակերվել, պարզվել է վարորդների ինքնությունը:
Ֆոտոլրագրողի տեղեկություններով՝ բոլոր վթարիների մասնակից վարորդները ենթարկվել են սթափության փորձաքննության, եղել են սթափ:
Ճանապարհը սպասարկում է Թալինի ճանշինը, սակայն վերջիններս մոտ 6 ժամից ավելի ոչ էլ բարեհաճել են ժամանել վթարի վայր, որպեսզի սեփական աչքով տեսնեն, թե իրենց փնթի աշխատանքի պատճառով քանի ավտովթար է տեղի ունեցել ու կլսեին, թե վարորդներն ու քաղաքացիները ինչպիսի, չակերտավոր ասած, քաղցր խոսքեր են ուղղում նրան հացեին:
Վարորդներն ու քաղաքացիները շնորհակալություն էին հայտնում Թալինի փրկարարներին, պարեկներին, համայնքային ոստիկաններին, փոխարենը հիշում էին ճանապարհը սպասարկող ընկերության ուղնուծուծը ու նրանց հասցեին շռայլում էին մի քանի բալանոց հայհոյանքներ:
Ֆոտոլրագրողը հայտնում է, որ ընդհանուր առմամբ այսօր այդ ճանապարհահատվածում բախվել է 27 տրանսպորտային միջոց, 7 վարորդներ, ժողովրդի լեզվով ասած, իրար հետ լեզու են գտել և հրաժարվել են ԱՊՊԱ ծառայությունից, իսկ մնացած դեպքերով զբաղվել են ՊԾ Արագածոտնի մարզի գումարտակի պարեկները:
