8 Հունիսի, 2024

«Հրապարակ» թերթը գրել է.

«Տավուշը հանուն հայրենիքի» համաժողովրդական դարձած շարժման ստվերային աջակիցները, պարզվում է, ավելի շատ են, քան բացահայտները։ Մենք նախորդ նյութում անդրադարձել էինք, որ քաղաքական դաշտի խաղացողներից քչերն են ֆիզիկական մասնակցություն ցուցաբերում ամենօրյա ակտիվ գործողություններին, եթե չասենք՝ հաշված ուժեր ու գործիչներ են ամենօրյա մասնակցություն ունենում ակցիաներին, մինչդեռ մեր պարապ դաշտի դեպքում ճիշտ կլիներ, որ ամենօրյա աշխատանքի նման ներկայանային եւ գոնե իրենց ֆիզիկական ներկայությամբ աջակցեին:

Բայց պատմում են, որ Բագրատ սրբազանի առաջնորդած շարժումն այս ամիսուկեսվա ընթացքում հասցրել է ազդեցիկ աջակիցներ գրավել, որոնք թե՛ ֆինանսապես, թե՛ բարոյապես աջակցում են, ոգեւորում, որ չհոգնի ու չհիասթափվի պայքարից` անկախ մարդկանց քանակից եւ վերելք-վայրէջքներից: Մի բան պարզ է, որ Հայաստանում դժգոհությունն այնքան մեծ է, որ մի փոքր կայծից կարող է հրդեհ բորբոքվել, եւ վճռական պահը գալու է: Առնվազն դա կարող է տեղի ունենալ իշխանությունների կողմից թուրք-ադրբեջանական ծրագրի իրականացման հաջորդ փուլում` չէ՞ որ «սահմանազատման-սահմանագծման» անվան տակ միակողմանի զիջումները շարունակվելու են: Առջեւում Սյունիքի միջանցքի հարցն է: Եվ ինչքան շուտ հեռացվեր այս «հանձնող» իշխանությունը, այնքան մեծ կլինեին շանսերը՝ պրոցեսը կանգնեցնելու, բայց, ցավոք, «կինոն» դեռ առջեւում է։

Աջակիցների անունները, բնականաբար, չենք հրապարակի՝ նրանց թիրախ չդարձնելու համար, բայց նշենք, որ սրբազան պայքարին իրենց աջակցության մասին հայտնել են Եվրոպայից, Ռուսաստանից գործարարներ, որոնք բացահայտ հայտարարություններ չեն անում, նախ՝ որպեսզի չվնասեն շարժմանը, որն առանց այն էլ իշխանական պրոպագանդան կապում է տարբեր կենտրոնների հետ, երկրորդ՝ չվնասեն իրենց բիզնես գործունեությանը Հայաստանում։

Հայաստանում տեղի ունենալիք փոփոխությունների գլխավոր շահառուն, իհարկե, Ռուսաստանն է, որն անխախտ հետաքրքրություն ունի տարածաշրջանի եւ Հայաստանի նկատմամբ, բայց նրանք մի անգամ միջամտել են` 2018-ին, աջակցելով իշխանափոխությանը` ընդդեմ Սերժ Սարգսյանի, եւ հիմա զգուշավորություն են ցուցաբերում` 18-ից դասեր քաղելով: Ի դեպ, որոշ վերլուծաբաններ կարծում են, որ Փաշինյանի սկսած շարժումը 2018-ին կմարեր, եթե ռուսական ընկերությունները եւ ռուսահայ գործարարները չմիանային նրան: ՌԴ-ն, թերեւս, կակտիվանա այն ժամանակ, երբ Սյունիքի միջանցքը տալու ժամանակը գա, եւ պարզվի, որ Փաշինյանը պատրաստ է այն տալ, եթե դրա վերահսկողությունն իրականացնեն եվրոպական ուժերը, այլ ոչ թե՝ ռուսական: Արեւմուտքի պահանջը դա է` Ռուսաստանին դուրս մղել տարածաշրջանից եւ միջանցքի սահմանային վերահսկողությունը հանձնել իրենց հատուկ ծառայությունների ներկայացուցիչներին (այս պահին Ֆրանսիայի անունն են տալիս)։

Հետեւաբար, ամառը կարող է վճռորոշ լինել, եւ չի կարելի թողնել, որ այս շարժումը մարի։
Այս ֆոնին Artur & brothers-ի կամ «շատ հետաքրքիր հայորդիների»` շարժմանը միանալն անհանգստություն է առաջացրել ՔՊ-ում։ Հունիսի 3-ին Բագրատ արքեպիսկոպոս Գալստանյանը բեմահարթակից ներկայացրեց, իր խոսքով, «շատ հետաքրքիր հայորդիներին»՝ Արտակին եւ Արթուրին։ «Մեզ միացել են մեր շատ սիրելի ընկերները, բարեկամները` Քենիայից։ Երեւի լսած կլինեք՝ «Արթուր բրադըրս»․ այսպես են իրենք հայտնի։ Մանրամասները չեմ ասում… շատ հետաքրքիր հայորդիներ են, հոգով, սրտով, մտքով, կյանքով նվիրված…»,- հայտարարեց սրբազանը։ Եղբայրներից մեկն էլ արձագանքեց. «Մենք էլ շատ մտածել ենք էս ազգի մասին, մի քիչ իրավաբանություն ենք սովորում, որ գիտելիքներս հերիքի՝ գալ հետագայում շարժում սկսել Հայաստանում, բայց մենք գտնում ենք, որ էսի ամենաճիշտ շարժումն ա, ու միանում ենք դրան։ Էս էն շարժումն ա, որ Ալիեւն ա վախենում, էս էն շարժումն ա, որ ղեկավարությունն ա վախենում»։

Անցած օրերին իշխանության ազդեցության տակ գտնվող լրատվամիջոցներն ու տելեգրամյան ալիքները հրապարակումներով հանդես եկան՝ այս եղբայրներին ներկայացնելով որպես քրեական հանցագործներ, տարբեր երկրներում իշխանափոխություն իրականացրած անձինք: Այդ աղմուկը հուշում է, որ այս եղբայրների ժամանելը Հայաստան ու մանավանդ շարժմանը միանալն անհանգստացրել է իշխանություններին։

Այդուհանդերձ, ովքեր են այս եղբայրները. 2005-ի դեկտեմբերին հայկական արմատներով Արթուր Մարգարյանն ու Արթուր Սարգսյանը ստիպված են եղել անհապաղ հեռանալ Մոսկվայից, ուղիղ մեկնել են օդանավակայան եւ նստել առաջին պատահած ինքնաթիռն ու մեկնել այն երկիրը, որը վիզա չի պահանջում` Քենիա։ Նրանց մասին հիշատակումներն աֆրիկյան ու միջազգային մամուլում սկսվում են 2005 թվականից, որոնց համաձայն՝ նրանք աֆրիկյան տարբեր երկրներում բիզնես են արել, այդ թվում` թմրանյութերի եւ այլ բնույթի, պետական հեղաշրջումներ են կազմակերպել, ահռելի ազդեցություն ունեցող կլան են ձեւավորել։ 2006-ին նրանք Քենիայից արտաքսվել են Դուբայ` մի աղմկոտ պատմության բացահայտումից հետո։

Ըստ Վիքիլիքսի՝ նրանք ունեցել են անօրինական փաստաթղթեր, որոնցով ներկայացել են որպես Քենիայի ոստիկանության ղեկավարի տեղակալներ եւ հասանելիություն են ունեցել օդանավակայանի բոլոր հատվածներին, եղել են զինված, խախտել են օդանավակայանի անվտանգության կանոնները։ Եվ Քենիայի խորհրդարանի հատուկ նիստում միգրացիայի նախարարը տեղեկացրել է, որ շենքից մաքրուհու միջոցով անհետացել է երեք անձնագիր՝ հատուկ համարներով, որոնք հայտնաբերվել են Արթուր եղբայրների տանը՝ խուզարկության ժամանակ։ «Արթուր եղբայրները» 2023-ին հայտնվել են Երեւանի ավագանու ընտրություններում թեկնածուներից մեկի՝ Սուրեն Պետրոսյանի կողքին, ով «Տավուշը հանուն հայրենիքի» շարժման ղեկավարներից է։ Ինչեւէ, իշխանություններին թերեւս սարսափեցնում է հեղաշրջում իրականացնելու ռեսուրսներ ու հմտություններ ունեցող այս եղբայրների ներկայությունը, եւ, վստահաբար, նրանք ուղիներ են փնտրում՝ նրանց հեռացնելու կամ ինչ-որ վարույթներ հարուցելու համար։

Շարժմանը միանալու պատրաստակամություն են հայտնել նաեւ հայաստանյան որոշ գործարարներ։ Շարժմանը սկսել են ցուցաբերել մեծ ֆինանսական աջակցություն, ինչպես 2018-ի ապրիլին ցուցաբերում էին Փաշինյանին` աշխարհի ամեն անկյունից եւ ՀՀ գործարար շրջանակներից: Մեծահարուստները, ըստ լուրերի, սրբազանին վստահեցնում են, որ պատրաստ են ամեն ինչ տալ, որպեսզի մեր երկրի կործանման ընթացքը կանգնեցնեն եւ թուրք-ադրբեջանական ծրագրերի իրականացումը գոնե այս փուլում կասեցնեն։ Բայց այս պարագայում ոչ այնքան ֆինանսի, որքան մտքի, աշխատանքի եւ համառության կարիք կա:

 

 

kotayk

Լրահոս