Նրա տեղեկացմամբ, առաջին անգամ, երբ անձը վարորդական վկայականի իրավունք ստանալու քննությունից բացասական գնահատական է ստանում տեսական կամ գործնական քննությունը, հաջորդ ամենասեղմ ժամկետը 1 շաբաթ անց վերահանձնելն է, բայց կան բազմաթիվ խնդրանքներ, դիմումներ քաղաքացիներից, որոնք պատրաստ են արագացված ծառայություններ ձեռք բերել, և դրա դիմաց ոչ թե 7 օր անց վերահանձնել քննությունը, այլ պայմանականորեն հաջորդ օրը, 3 կամ 4 օր հետո:
Նախարարաը հայտնեց, որ կա նաև 2-րդ և յուրաքանչյուր հաջորդ նգամ բացասական գնահատականի դեպքում վերահանձնման հնարավորություն: Այս դեպքում օրենսդրությունը սահմանում է, որ ամենասեղմ ժամկետը 1 ամիս անց վերահանձնումն է:
«Այստեղ ևս սահամանել ենք ժամկետային որոշակի հնարավորություններ. երկրորդ և յուրաքանչյուր հաջորդ անգամ բացասական գնահատական ստանալու դեպքում 7-րդ օրը քննությանը մասնակցելու հնարավորություն, և յուրաքանչյուր հաջորդ անգամ՝ այս դեպքում արդեն 14-րդ օրը, քննության մասնակցելու հնարավորություն»,- հայտարարեց Արփինե Սարգսյանը:
Նրա խոսքով՝ Տրանսպորտային միջոցների առուվաճառքը թվային հարթակում իրականացնելու նախաձեռնության շրջանակում քաղաքացիներին հնարավորություն կտրվի հաշվառման համարանիշը ստանալ նաև փոստային առաքմամբ, եթե առաջին անգամ է գրանցումը տեղի ունենում:
«Տվյալ հնարավորությունը թույլ կտա համապատասխան վճարի դեպքում քաղաքացուն առաքել հաշվառման համարանիշը»,- ասաց նախարարը՝ հավելելով, որ այն հավելյալ ծառայություն է, և եթե քաղաքացին չունի ցանկություն՝ օգտվելու այս ծառայությունից, ապա կարող է կիրառել գործող տարբերակը:
«Ֆիզիկապես հաշվառման վկայագրի և վարորդական վկայականի պլաստիկին զուգահեռ հնարավորություն կտանք թվային տիրույթում ունենալ նաև այս վկայագրերի թվայնացված տարբերակը, և ՀՀ տարածքում իրավաչափ ու թույլատրելի համարել նաև թվային տարբերակով վարորդական վկայականի ու հաշվառման վկայագրերի շրջանառությունը»,-օրենսդրական կարգավորման երրորդ դրույթը ներկայացրեց Արփինե Սարգսյանը։
Նար խոսքով՝ եթե կա Պարեկային ծառայության կողմից արձանագրված ճանապարհային երթևեկության որևէ կանոնի խախտում, և եթե անձը չունի պլաստիկ վկայական, բայց կա թվային տարբերակով վկայականը, սա չի հանգեցնի որևէ վարչական պատասխանատվության կիրառման:
